काँग्रेसनं केली ती खरेदी, मी केला तर तो घोटाळा?

मुंबई : चिक्की खरेदीत २०६ कोटींचा घोटाळा केल्याच्या आरोपानंतर आज भारतात परतलेल्या महिला व बालविकास मंत्री पंकजा मुंडे यांनी या घोटाळ्यावर मीडियासमोर स्पष्टीकरण दिलंय. 

मुख्यमंत्र्यांनी दर करासासाठीही ईटेंडरिंग करण्याचे आदेश एप्रिलमध्ये दिलेत, माझ्या खात्यातील खरेदी ही फेब्रुवारी आणि मार्चमध्ये झाली आहे, असं म्हणत पंकजा मुंडे यांनी आपल्यावरचे आरोप धुडकावून लावलेत. शिवाय, काँग्रेस सरकारच्या काळात निश्चित झालेल्या दरानुसारच ही खरेदी झाली, असंही स्पष्टीकरण त्यांनी दिलंय. 

पाहुयात त्या काय काय म्हणाल्यात....

• माझ्यावर झालेला २०६ कोटींच्या भ्रष्टाचाराचा आरोप खोटा आहे... हा केवळ शब्दांचा घोटाळा आहे : पंकजा मुंडे

• घोटाळा शब्द वापरुन खळबळ निर्माण करण्याचा प्रयत्न झाला... हे सारे राजकीय आरोप माझ्या प्रतिमेला मलिन करण्यासाठी केले गेलेत : पंकजा मुंडे

• एकाही पैशाचा अपहार झालेला नाही... माझ्यावर केल्या गेलेल्या सगळ्या आरोपांचा मी खंडन करतेय.

• करासासाठीही ईटेंडरिंग करण्याचे आदेश एप्रिलमध्ये दिलेत, माझ्या खात्यातील खरेदी ही फेब्रुवारी, मार्चमध्ये झाली: पंकजा

• ज्या विभागात दरकरार निश्चित आहेत त्यासाठी ई टेंडरिंगची गरज नसते, नवीन करारासाठी ई टेंडरिंग करावे लागते : पंकजा मुंडे

• काँग्रेस काळातल्या दरानुसार खरेदी केली... हे करार दर अगोदरपासूनच निश्चित होते : पंकजा 

• मंत्री होण्यापूर्वी महिला व बालकल्याण खात्यात ४०८ कोटींची खरेदी झाली, मी २०६ कोटींची खरेदी हा घोटाळा म्हणणे अयोग्य : पंकजा

• काही लोकांना झुकतं माप दिल्याचा आरोपही खोटा आहे... राज्यात एकच दर करार असल्याने त्याच व्यक्तीला कंत्राट, काँग्रेसच्या काळातही याच व्यक्तीला कंत्राट दिलं गेलं होतं... मग, मी केलेल्या खरेदीला स्कॅम कसं म्हणायचं? रेट कॉन्ट्रॅक्टबाबत कुणालाही मागे घातलेलं नाही

• मी खरेदीप्रक्रियेत कोणताही नियम धाब्यावर बसवलेला नाही... मुख्यमंत्र्यांचे आदेश डावललेले नाहीत : पंकजा मुंडे

• माझ्या खात्याला मिळालेला पैसा वाया जाऊ नये म्हणून मी हा निर्णय घेतला : पंकजा मुंडे़

• मी भारतात नाही हे पाहून मगच आरोप करण्यात आले

• परदेशातूनही मीडियाशी संपर्क कायम ठेवला.. मुख्य सचिवांद्वारे मुख्यमंत्र्यांकडेही स्पष्टीकरण दिलंय.

• चिक्कीची तपासणी लॅबमध्ये करण्यात आलीय... अहमदाबाद आणि नाशिकमधील प्रयोगशाळेतून तपासणी केली आहे... चटईंची खरेदीही आधीच्याच दराने झालीय

• ... तरीही कुठल्याही चौकशीसाठी मी तयार - पंकजा मुंडे

• खरेदीची माहिती दडवण्याचा प्रयत्न केलेला नाही. आरोप सिद्ध असल्यास मी पदाचा राजीनामा देईन - पंकजा

उल्लेखनीय बाब म्हणजे पंकजा मुंडेंवरील आरोपांबाबत त्या खुलासा करत असताना, भाजपचा अन्य कुणीही मंत्री त्यांच्यासोबत नव्हता... शिक्षणमंत्री विनोद तावडेंवरील आरोपांचं खंडन करण्यासाठी मंगळवारी तीन-तीन मंत्री मीडियाला सामोरे गेले. आज पंकजा मुंडेंना मात्र एकाकी खिंड लढवावी लागली. त्यामुळं त्या भाजपमध्ये एकाकी पडल्याचं बोललं जातंय... दरम्यान, सुधीर मुनगंटीवार यांचे कार्यक्रम आधीच ठरले असल्यानं आपणच त्यांना येऊ नका असं सांगितलं. तर मुख्यमंत्री परदेशात आहेत, अशी सारवासारव स्वतः पंकजा मुंडेंनीच केली.

* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.

* झी २४ तासला ट्विटरवर फोलो करा.