हार्दिक पांड्याने केला करिष्मा, ICC क्रमवारीत प्रथम क्रमांक मिळवत घडवला इतिहास

Hardik Pandya Reclaims No 1 T20I All Rounder in ICC Rankings: भारतीय क्रिकेट संघाचा अष्टपैलू खेळाडू म्हणजे हार्दिक पांड्या. हार्दिकने  भारताला यावर्षी टी-२० विश्वचषक जिंकून देण्यात महत्त्वाची भूमिका बजावली आहे. तो T20I क्रिकेटमध्ये टीम इंडियासाठी महत्त्वपूर्ण योगदान देत आहे. नुकत्याच झालेल्या दक्षिण आफ्रिका दौऱ्यातही हार्दिक पांड्याने चांगली कामगिरी केली, त्याचा फायदा त्याला आता  आयसीसी क्रमवारीत झाला आहे. हार्दिक पांड्या आयसीसी क्रमवारीत नंबर 1 टी-20 अष्टपैलू खेळाडू बनला आहे. पंड्याने 2 स्थानांची झेप घेत हा मोठा टप्पा गाठला. भारतीय अष्टपैलू खेळाडूने इंग्लंडचा दिग्गज अष्टपैलू खेळाडू लियाम लिव्हिंगस्टोनकडून नंबर-1चा मुकुट काढून घेतला आहे.

या रँकिंगनुसार तो या फॉरमॅटमध्ये टीम इंडियासाठी किती महत्त्वाचा आहे याचा अंदाज लावला जाऊ शकतो. या वर्षी हार्दिकने T20I क्रिकेटमध्ये 352 धावा केल्या आहेत. दक्षिण आफ्रिका दौऱ्यावर शेवटच्या T20I सामन्यात हार्दिकने अप्रतिम कामगिरी केली होती. त्याने 3 षटकात केवळ 8 धावा देत 1 बळी घेण्याचा महान पराक्रम केला होता. यादरम्यान त्याने एक मेडन ओव्हरही टाकला.

हार्दिकने वर्षभरात पटकावले दुसऱ्यांदा अव्वल स्थान 

हार्दिक 244 रेटिंग गुणांसह T20I अष्टपैलूंच्या क्रमवारीत अव्वल स्थानावर आहे. हार्दिकमुले आता नेपाळचा दीपेंद्र सिंग ऐरी दुसऱ्या स्थानावर आहे. लियाम लिव्हिंगस्टोन 2 स्थानांनी घसरून तिसऱ्या स्थानावर आला आहे. ऑस्ट्रेलियाचा मार्कस स्टॉइनिस चौथ्या तर श्रीलंकेचा वानिंदू हसरंगा पाचव्या स्थानावर आहे. अफगाणिस्तानचा मोहम्मद नबी सहाव्या तर झिम्बाब्वेचा सिकंदर रझा सातव्या स्थानावर आहे. ICC क्रमवारीत अव्वल-10 अष्टपैलू खेळाडूंमध्ये वेस्ट इंडिजचा रोमॅरियो शेफर्ड आठव्या, दक्षिण आफ्रिकेचा एडन मार्कराम नवव्या आणि गेरहर्ड इरास्मस दहाव्या स्थानावर आहे.

A return to No.1 for one of India's best in the latest T20I Rankings https://t.co/NpVQN2k53C

— ICC (@ICC) November 20, 2024

हार्दिक पांड्या ऑस्ट्रेलिया दौऱ्यावर गेलेल्या कसोटी संघाचा भाग नाही. तो बराच काळ कसोटी संघाबाहेर आहे. तथापि, पांड्या लवकरच त्याचा भाऊ कृणाल पांड्याच्या नेतृत्वाखाली आगामी सय्यद मुश्ताक अली ट्रॉफीमध्ये बडोद्यासाठी देशांतर्गत क्रिकेट खेळताना दिसणार आहे.