'मंकी मॅन'च्या अफवेमुळे निष्पापांचे बळी

चोर सोडून भलत्यालाच बदडण्याच्या घटना ठाण्यातही घडत आहेत. मंकी मॅन आणि चड्डी बनियान टोळीच्या अफवांनंतर धास्तावलेले लोक मग मिळेल त्या अनोळखी व्यक्तीवर राग काढत आहेत. ठाण्याच्या चरई भागात काही दिवसांपूर्वी एका कामगाराला अशीच मारहाण करण्यात आली. चोरांच्या भीतीनं जागणारा हा कामगार एका परिसरातून दुसऱ्या परिसरात गेला आणि तिथं जागरण करणाऱ्या लोकांना त्याला संशय आल्यानं चोर समजून त्यांनी त्याला मारहाण केली.

मुंबईकर मंकी मॅन आणि चड्डी बनियान टोळीच्या अफवांनी पुरते दहशतीखाली आहेत आणि त्यातूनच चोर सोडून भलत्याच लोकांना मारहाणीचे प्रकारही वाढले आहेत.

ठाणे, मुलुंड भागात काही दिवसांपूर्वी मारहाणीच्या अशाच घटना घडल्या. दहशतीखाली असलेले नागरिक दिवस-रात्र डोळ्यात तेल घालून पहारा देत आहेत आणि रात्री-रात्री जागून काढतात. अशाच वेळी कोणी अनोळखी व्यक्ती दिसली तर चोर समजून त्याला बेदम मारहाण केली जाते.

मुलुंडमध्ये काही दिवसांपूर्वी अशीच काही व्यक्तींना मारझोड करण्यात आली. चड्डीवर असलेल्या कामगाराला चड़्डी-बनियान टोळीचा सदस्य समजून नागरिकांनी बेदम मारलं, पण नंतर तो सामान्य कामगार असल्याचं स्पष्ट झालं. त्यामुळे अनोळखी व्यक्ती एखाद्या परिसरात दिसली तर तिथले नागरिक संशयग्रस्त नजरेनं पाहतात, आणि त्यातच संशय वाढला तर बेदम मारहाण करण्यास मागेपुढे पाहत नाहीत. त्यामुळे अनेकदा निष्पांपांना या अफवेतून रोषाचे बळी ठरावं लागतंय.

नागरिकांनी अफवांवर विश्वास न ठेवता संयम बाळगणं गरजेचं बनलं आहे, तसंच संशयास्पद व्यक्ती दिसली तर तिला पकडून पोलिसांकडे देणं हाच योग्य पर्याय ठरू शकतो.