स्वार्थासाठी सेनेला बाळासाहेबांचा विसर - पवार

www.24taas.com, झी मीडिया, परभणी
`शिवसेनेलाच शिवसेनाप्रमुख बाळासाहेब ठाकरेंचा विसर पडला आहे. ज्या बाळासाहेबांनी शिवसेना जन्माला घातली त्यांच्याच तोंडात बाळासाहेबांचे नाव न येणे; हे दुर्दैवचं म्हणावे लागेल` अशा कटू शब्दांत राष्ट्रवादी काँग्रेसचे अध्यक्ष शरद पवार यांनी शिवसेनेवर टीका केलीय. शरद पवार परभणी लोकसभा मतदारसंघातील राष्ट्रवादी काँग्रेस आणि काँग्रेस आघाडीचे उमेदवार विजय भांबळे यांच्या प्रचारासभेत बोलत होते.
`देशात सर्वच ठिकाणी भाजप मोदींच्या नावाचा गजर करत आहे. यामध्ये शिवसेना कुठेचं दिसत नाही. शिवसेना तर आता बाळासाहेबांचं नाव सोडून मोदी-मोदी जप करत आहेत. यातच भाजपाचे पंतप्रधानपदाचे उमेदवार नरेंद्र मोदी हे गुडघ्याला बाशिंग बांधून बसले आहेत. पण, मोदींचा खरं म्हणजे भारतीय लोकशाहीवर विश्वास नाही` असं म्हणत पवारांनी शिवसेना - भाजपवर हल्ला चढवलाय.
शिवसेना केवळ स्वार्थासाठीच मोदींच्या नावाचा जप करत आहे. लोक शिवसेनेला माफ करणार नाही. काही पक्षांकडून जाती-धर्माच्या नावावर द्वेष पसरविण्याचे काम सुरु आहे, अशा शब्दांत पवारांनी महायुतीवर टीका केलीय.

• इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.
• झी २४ तासला ट्विटरवर फोलो करा.