UAE मध्ये पावसाने मोडला 27 वर्षांचा रेकॉर्ड, वाळवंटात आला पूर

मुंबई : कतार आणि संयुक्त अरब अमिरातीमध्ये गुरुवारी मुसळधार पाऊस पडला आणि रस्ते जलमय झाले. त्यामुळे अनेकांना हॉटेल्सचा आसरा घ्यावा लागला. पावसामुळे यूएईच्या पूर्वेकडील भागात पूरसदृश परिस्थिती निर्माण झाली, ज्यामुळे घरांचे नुकसान झाले आणि अनेक वाहने वाहून गेली. (Heavy Rain in UAE and Katar)

हवामानातील या अचानक बदलामुळे, UAE हवामान विभागाने रेड अलर्ट जारी केला, असे खलीज टाईम्सच्या अहवालात म्हटले आहे. सोशल मीडियावर शेअर होत असलेल्या फोटो व्हिडिओमध्ये दिवसभराच्या पावसानंतर महामार्गावर वाहने पाण्यात तरंगताना दिसत आहेत. एका व्हिडिओमध्ये बचाव कर्मचारी पूरग्रस्त भागात अडकलेल्या लोकांना वाचवताना दिसत आहेत.

अल अरबिया इंग्लिशने नोंदवले की UAE चे आपत्ती व्यवस्थापन प्राधिकरण 20 हून अधिक हॉटेल्सच्या संपर्कात आहे ज्यात पुरामुळे विस्थापित झालेल्या 1,885 पेक्षा जास्त लोकांचा समावेश आहे. UAE हवामान खात्याने म्हटले आहे की, देशातील पावसाने 27 वर्षांचा विक्रम मोडला आहे.

कतारची परिस्थिती यूएईसारखीच आहे. मुसळधार पावसामुळे राजधानी दोहामधील रस्ते पाण्याखाली गेले आहेत. मिडल ईस्ट आयच्या वृत्तानुसार, गुरुवारी झालेल्या पावसामुळे विश्वचषकाच्या ठिकाणाजवळील रस्ते आणि वाहने पाण्याखाली गेली होती.

अल जझीराने म्हटले की, वादळ आणि पाऊस गुरुवारी लवकर सुरू झाला आणि या आठवड्याच्या अखेरीस सुरू राहण्याची शक्यता आहे. हवामान विभागाने दिलेल्या माहितीनुसार, दोहामध्ये सुमारे 38 मिमी पावसाची नोंद झाली आहे. अहवालानुसार, दोहामध्ये जुलै महिन्यात पाऊस सामान्य नाही.

साधारणपणे येथील उन्हाळा हा कोरडा आणि अत्यंत उष्ण असतो. भारतातही राजस्थानसारख्या वाळवंटी भागात सध्या मुसळधार पाऊस पडत आहे, त्यामुळे अनेक शहरात रस्ते जलमय झाले असून अनेक ठिकाणी सतर्कतेचा इशारा देण्यात आला आहे.

वाळवंटातील पाऊस आणि युरोपीय देश आणि ब्रिटनमधील आग ही हवामान बदलाची सर्वात घातक उदाहरणे आहेत. काही दिवसांपूर्वी, इंग्लंड या सर्वात थंड देशाने इतिहासातील सर्वात उष्ण दिवसाची नोंद केली जेव्हा तापमान 40 अंश सेल्सिअसवर गेले. दक्षिण-पश्चिम लंडनमधील हिथ्रो येथे 40.2 अंश सेल्सिअस तापमानाची नोंद झाली.