IPL 2021 | ठरलं! आयपीएलच्या 14 व्या मोसमातील उर्वरित सामन्यांना 'या' दिवसापासून सुरुवात

दुबई : कोरोनाच्या शिरकावामुळे स्थगित करण्यात आलेला आयपीएलचा 14 वा हंगाम (IPL 2021) पुन्हा सुरु होणार आहे. येत्या 19 सप्टेंबरपासून 14 व्या मोसमातील उर्वरित सामन्यांना सुरुवात होणार आहे. या दुसऱ्या टप्प्यात एकूण 31 सामने खेळवण्यात येणार आहेत. तर 15 ऑक्टोबरला अंतिम सामना खेळवण्यात येणार आहे. बीसीसीआयने ट्विट करत याबाबतची माहिती दिली आहे. (The remaining matches of the 14th season of the IPL 2021 will start on September 19 in Dubai)

दुसऱ्या टप्प्यातील पहिला सामना 

आयपीएल 2021 च्या दुसऱ्या टप्प्यातील पहिला सामना हा टॉप 2 संघामध्ये अर्थात मुंबई इंडियन्स विरुद्ध चेन्नई सुपर किंग्स यांच्यात खेळवण्यात येणार आहे. हा सामना दुबईत खेळवण्यात येणार आहे. दुसऱ्या टप्प्यातही एकूण 3 स्टेडियममध्येच हे सामने खेळवले जातील. त्यापैकी दुबईमध्ये 13, शारजाहमध्ये 10 तर अबूधाबीत  8 सामने खेळवण्यात येणार आहे. तर फायनल मॅचचे (IPL 2021 Final) आयोजनही दुबईत करण्यात आलंय.
 
स्पर्धेतील साखळी फेरीतील  शेवटचा सामना हा 9 ऑक्टोबरला बंगळुरु विरुद्ध दिल्ली यांच्यात खेळवला जाईल. त्यानंतर पहिला क्वालिफायर सामना हा 10 ऑक्टोबरला पार पडेल. तर दुसरी क्वालिफायर आणि एलिमिनेटर मॅच 11 आणि 13 ऑक्टोबरला पार पडणार आहे. या मोसमातील पहिल्या टप्प्यात एकूण 29 सामन्यांचे यशस्वीरित्या आयोजन करण्यात आले होते. मात्र त्यांनतर खेळाडूंना कोरोना झाल्याने मोसम स्थगित करावा लागला.

27 दिवसात 31 सामने 

बीसीसीआयने  यूएईत एकूण 27 दिवसांमध्ये 31 सामन्यांचं आयोजन केलंय. यामध्ये 7 डबल हेडर सामन्यांचा समावेश आहे. डबल हेडर म्हणजे एका दिवसात दोन सामने. दिवसातील पहिल्या मॅचला दुपारी  3 वाजून 30  मिनिटांनी सुरुवात होईल. तर संध्याकाळचा सामना नेहमीप्रमाणे 7.30 वाजता सुरु होईल. 

BCCI announces schedule for remainder of VIVO IPL 2021 in UAE.

The 14th season, will resume on 19th September in Dubai with the final taking place on 15th October.

More details here - https://t.co/ljH4ZrfAAC #VIVOIPL

— IndianPremierLeague (@IPL) July 25, 2021

25 सप्टेंबरपासून डबल हेडर

14 व्या मोसमातील पहिली डबल हेडर मॅच 25 सप्टेंबरपासून खेळवण्यात येणार आहे. यामधील पहिली मॅच ही दिल्ली विरुद्ध राजस्थान यांच्यात पार पडेल. तर दुसरी मॅचमध्ये हैदराबाद आणि पंजाब किंग्स आमनेसामने असतील.