राज ठाकरे करणार उद्या पत्ते खुले!

www.24taas.com, मुंबई

ठाणे महापालिकेच्या महापौरपदासाठी जोरदार चुरस असून महाराष्ट्र नवनिर्माण सेना उद्या आपले पत्ते ओपन करणार आहे. मनसे अध्यक्ष राज ठाकरे उद्य दुपारी पत्रकार परिषद घेऊन आपली भूमिका स्पष्ट करणार आहे. त्यामुळे महापौरपदाच्या निवडणूकीत मनसे कोणती भूमिका घेणार याकडे सर्वांचे लक्ष लागून राहिले आहे.

राज ठाकरे यांची पत्रकार परिषद ठाण्याच्या गर्व्हमेंट रेस्ट हाऊस येथे होणार आहे. त्यावेळी ते आपली भूमिका स्पष्ट करतील. त्यानुसार त्यांचे नगरसेवक महापौर निवडीच्या मतदानात भाग घेतली किंवा तटस्थ राहतील.

उद्या महापौरपदासाठी निवडणूक होणारयं. महापालिकेत शिवसेनेकडे सर्वाधिक 53 जागा आहेत. तर मित्रपक्ष भाजपकडे 8 आणि रिपाईकडे 1 जागा आहे. बसपाचे दोन नगरसेवक आणि दोन अपक्षांनी महायुतीला पाठिंबा दर्शवलाय त्यामुळे महायुतीच्या जागांची संख्या 66 होते आहे.

दुसरीकडे राष्ट्रवादीकडे 34 जागा आहेत. काँग्रेसकडे 18 जागा आहेत. पाच अपक्षांनी आघाडीला पाठिंबा दर्शवलाय. त्यामुळे आघाडीचं संख्याबळ 57 वर पोहचलय. सत्तास्थापनेसाठी आवश्यक असलेला 66 चा आकडा गाठण्यासाठी त्यांना 9 जागांची आवश्यकता आहे. महापालिकेत मनसे सदस्यांची संख्या 7 आहे. या निवडणूकीत मनसेनं अद्याप कुणालाही पाठिंबा दर्शवलेला नाही. त्यामुळे या निवडणुकीत मनसेची भूमिका महत्वपूर्ण ठरणार आहे.

महायुतीतर्फे महापौरपदासाठी हरिश्चंद्र पाटील यांना तर उपमहापौरपदासाठी मिलिंद पाटणकर यांना उमेदवारी देण्यात आलीय. आघाडीतर्फे महापौरपदासाठी नजीब मुल्ला आणि उपमहापौरपदासाठी भरत चव्हाण निवडणुकीच्या रिंगणात आहेत. महापौर निवडणुकीच्या पार्श्वभूमीवर भाजप नगरसेविका सुहासिनी लोखंडे यांचं अपहरण झाल्याच्या बातमीनं खळबळ उडालीय. आघाडी आणि युतीच्या नेत्यांमध्ये आरोप-प्रत्यारोपांचा फैरी झडू लागल्यायते. आता सत्तास्थापनेसाठी महायुती आणि आघाडीची रणनिती कशी असेल हे पाहणं औत्सुक्याचं ठरणार आहे.