मोठी बातमी: सर्वोच्च न्यायालयाकडून BS-IV श्रेणीतील नव्या वाहनांच्या नोंदणीला स्थगिती
यापूर्वी न्यायालयाने BS-IV श्रेणीतील वाहनांची विक्री ३१ मार्च २०२० पासून बंद करण्याचे आदेश दिले होते.
)
नवी दिल्ली: सर्वोच्च न्यायालयाने शुक्रवारी बीएस-4 श्रेणीतील BS-IV नव्या वाहनांची नोंदणी स्थगित करण्याचे आदेश दिले. न्यायालयाचा पुढील आदेश येईपर्यंत ही बंदी कायम राहील. यावेळी सर्वोच्च न्यायालयाने मार्च महिन्यात लॉकडाऊननंतर BS-IV वाहनांच्या मोठ्याप्रमाणावर झालेल्या विक्रीबद्दल तीव्र नाराजी व्यक्त केली. लॉकडाऊनच्या काळात BS-IV श्रेणीतील वाहनांच्या विक्रीत प्रचंड वाढ झाल्याचे निरीक्षण यावेळी न्यायालयाने नोंदवले. आता याप्रकरणाची पुढील सुनावणी १३ ऑगस्ट रोजी होणार आहे.
यापूर्वी न्यायालयाने BS-IV श्रेणीतील वाहनांची विक्री ३१ मार्च २०२० पासून बंद करण्याचे आदेश दिले होते. मात्र, २४ मार्च रोजी देशभरात लॉकडाऊन करण्यात आल्यानंतर ऑटोमोबाईल डिलर्स असोसिएशनने BS-IV वाहनांच्या विक्रीसाठी मुदत वाढवून देण्याची विनंती न्यायालयाला केली होती. त्यानुसार २४ मार्चपासून सुरु झालेला लॉकडाऊन संपल्यानंतर पुढील १० दिवसांत BS-IV श्रेणीतील उर्वरित वाहने विकण्यास सर्वोच्च न्यायालयाने मुभा दिली होती. तसेच या वाहनांची नोंदणी करण्याचा कालावधीही वाढवण्यात आला होता.
Supreme Court bars registration of BS-IV vehicles till further orders and expresses displeasure on the sale of large number of vehicles in March during lockdown; says an unusual number of BS-IV vehicles were sold during the lockdown. Matter to be heard on August 13. pic.twitter.com/y6WlvboPDq
— ANI (@ANI) July 31, 2020
मात्र, या अतिरिक्त कालावधीत BS-IV श्रेणीतील वाहनांची नेहमीपेक्षा जास्त विक्री झाली. त्यामुळे आता न्यायालयाने या नव्या वाहनांच्या नोंदणीवर सरसकट बंदी आणण्याचा निर्णय घेतला आहे. त्यामुळे आता नवीन वाहन खरेदी केलेल्या BS-IV श्रेणीतील वाहनधारकांच्या अडचणी वाढण्याची शक्यता आहे.