मुंबई विद्यापीठाच्या विद्यार्थ्यांना मिळणार कार्यांतर्गत प्रशिक्षण आणि इंटर्नशिप, अमेरिकेच्या विद्यापीठासोबत महत्वाचा करार

Mumbai University Associate Degree in Chemistry: मुंबई विद्यापीठ आणि अमेरिकेतील प्रसिद्ध सेंट लुईस विद्यापीठ यांच्यात झालेल्या करारानुसार मुंबई विद्यापीठात प्रत्यक्षात सह पदवीच्या शिक्षणाला सुरुवात झाली आहे. एमएस डेटा एनालिटिक्स आणि एमएस सायबर सिक्युरिटी या दोन अभ्यासक्रमांच्या सह पदवीला विद्यार्थ्यांकडून मिळालेल्या उत्स्फूर्त प्रतिसादानंतर आता केमिस्ट्रीमध्ये सह पदवीसाठी विद्यापीठाने पुढाकार घेतला आहे. नुकतेच मुंबई विद्यापीठाच्या शिष्टमंडळाच्या वतीने कुलगुरू प्रा. रवींद्र कुलकर्णी यांनी सेंट लुईस विद्यापीठाचे अध्यक्ष डॉ. फ्रेड पेस्टेलो यांची सेंट लुईस मिसोरी स्टेट यूएसए येथे भेट घेऊन या विषयावर सविस्तर चर्चा करून पदव्युत्तर स्तरावरील केमिस्ट्री मध्ये सह पदवीच्या शिक्षणासाठी स्वारस्य दाखवले आहे. याबाबत लवकरच शैक्षणिक सामंजस्य करार करण्यात येणार आहे.

विद्यार्थ्यांना कार्यांतर्गत प्रशिक्षण आणि इंटर्नशिप

शैक्षणिक वर्ष 2025-26 पासून दोन्ही विद्यापीठामार्फत एमएससी केमिस्ट्री या सह पदवीसाठी प्रविष्ठ होणाऱ्या विद्यार्थ्यांना प्रथम वर्षाच्या दोन सत्राचे शिक्षण मुंबई विद्यापीठात तर द्वितीय वर्षाच्या दोन सत्राचे शिक्षण सेंट लुईस विद्यापीठात मिळणार आहे. त्याचबरोबर विद्यार्थ्यांना कार्यांतर्गत प्रशिक्षण आणि इंटर्नशिपही करता येणार आहे. विशेष म्हणजे सह पदवी कार्यक्रमाअंतर्गत विद्यार्थ्यांस दोन्ही विद्यापीठाची पदवी मिळणार आहे. आंतरराष्ट्रीय मान्यताप्राप्त विद्यापीठांच्या या सह पदवीमुळे प्रत्येक संस्थेच्या सामर्थ्याचा आणि कौशल्याचा विद्यार्थ्यांच्या शैक्षणिक उत्कृष्टता वृध्दीस हातभार लागणार आहे. 

अध्ययन आणि संशोधनातील संभाव्य परिणाम

एमएससी केमिस्ट्री या अभ्यासक्रमासाठी प्रविष्ठ होणाऱ्या विद्यार्थ्यांना आंतरराष्ट्रीय वातावरणात केमिस्ट्रीमधील विविध विषयातील अध्ययनाच्या शाखा, संशोधन पद्धती, अद्ययावत प्रयोगशाळा आणि  उपकरणांचा अभ्यास करता येईल. त्याचबरोबर या सहयोगाअंतर्गत दोन्ही विद्यापीठातील पायाभूत आणि अनुषंगिक सुविधा, कौशल्य आणि आधुनिक उपकरणे आणि संसाधनाच्या एकत्रित वापरामुळे अध्ययन आणि संशोधनातील संभाव्य परिणाम साध्य करता येऊ शकणार असल्याचे मुंबई विद्यापीठाचे कुलगुरू प्रा. रवींद्र कुलकर्णी यांनी सांगितले. 

जागतिक समज विस्तृत करण्यास मदत 

पुढे जाऊन या कराराची व्याप्ती वाढवून मानव्यविज्ञान विद्याशाखेअंतर्गत समाजशास्त्र विषयात सह पदवीच्या शिक्षणासाठी पुढाकार घेतला जाणार असल्याचे त्यांनी सांगितले. या करारामुळे उच्च शिक्षणाच्या आंतरराष्ट्रीयकरणाच्या दिशेने वाटचाल करताना रसायनशास्त्र शाखेतील उद्योन्मुख क्षेत्रात भारत आणि अमेरिकेतील संशोधनाच्या प्राधान्यक्रमामुळे विद्यार्थ्यांना या क्षेत्रातील जागतिक समज विस्तृत करण्यास मदत होईल तसेच विद्यार्थ्यांसाठी संधीचे नवे दालनही खुले होणार असल्याचेही प्रा. रवींद्र कुलकर्णी यांनी सांगितले.

विद्यार्थ्यांना सहाय्य

मुंबई विद्यापीठाच्या राष्ट्रीय आणि आंतरराष्ट्रीय साहचर्य आणि विद्यार्थी सहाय्य केंद्राच्या वतीने सेंट लुईस विद्यापीठात द्वितीय वर्षाच्या दोन सत्राचे शिक्षण घेणाऱ्या विद्यार्थ्यांना व्हिजा सुलभीकरण, तज्ज्ञांकडून सपुदेशन, कागदपत्रांचे साक्षांकीकरण, शिष्यवृत्ती सहाय्य, वसतिगृह सहाय्य अश्या अनुषंगिक बाबींसाठी सहाय केले जाणार आहे. 

असोशिएट डीग्रीचे फायदे

असोशिएट पदवीमुळे विद्यार्थ्यांना अनेक फायदे होणार आहेत. विद्यार्थ्यांस दोन्ही विद्यापीठाची पदवी मिळवण्याची संधी मिळणार आहे. मुंबई विद्यापीठ आणि सेंट लुईस विद्यापीठाकडून मिळणाऱ्या सह पदवीमुळे विद्यार्थ्यांच्या शैक्षणिक कामगिरीची आंतरराष्ट्रीय ओळख वाढविण्यास मदत होईल. तसेच विद्यार्थ्यांना भारत आणि अमेरिका या दोन्ही देशांतील वैविध्यपूर्ण शैक्षणिक वातावरण, अध्यापन पद्धती आणि संशोधन पद्धतींचा फायदा घेता येणार आहे. दोन वेगवेगळ्या देशांमध्ये राहणे आणि अभ्यास करण्यामुळे विद्यार्थ्यांना सांस्कृतिक जागरूकता, अनुकूलता आणि भाषा कौशल्ये विकसित करण्यास मदत होईल. तसेच सांस्कृतिक आणि भाषा कौशल्ये वृद्धीस मदत होईल. यासोबतच दोन्ही संस्थांमधील अत्याधुनिक संशोधन सुविधा आणि प्रयोगशाळांच्या प्रवेशामुळे व्यावहारिक कौशल्ये आणि संशोधन क्षमता वाढीस चालना मिळणार आहे.