'...तर मतदान वाढलं असतं,' उद्धव ठाकरेंचा उल्लेख करत दानवेंनी स्पष्टच सांगितलं; 'सांगत असतानाही मुख्यमंत्री...'

Ambadas Danve on Uddhav Thackeray: उद्धव ठाकरेंचं (Uddhav Thackeray) नाव मुख्यमंत्रिपदासाठी जाहीर केलं असतं तर विधानसभा निवडणुकीत (Maharashtra Assembly Election) महाविकास आघाडीचं (Mahavikas Aghadi) मतदान 2 ते 5 टक्क्यांनी वाढलं असतं असा दावा अंबादास दानवे (Ambadas Danve) यांनी केला आहे. यावेळी त्यांनी लोकसभा जिंकल्यानंतर काँग्रेसमध्ये अती आत्मविश्वास निर्माण झाला असंही सांगितलं. तसंच काँग्रेसमध्ये 10 जण मुख्यमंत्रिपदासाठी इच्छुक होते असाही दावा केला. 

स्वबळावर लढण्यासंबंधी विचारण्यात आलं असता अंबादास दानवे म्हणाले की, "मी काल ताकद निर्माण केली पाहिजे अशी भूमिका मांडली. स्वराज्य संस्था निवडणुकीसाठी कामला लागलं पाहिजे असं मी म्हटलं होतं. महाविकास आघाडीतून बाहेर पडलं पाहिजे असं मी म्हणालेलो नाही". पुढे ते म्हणाले, "महाविकास आघाडीच्या माध्यमातून आम्ही 33 जागा निवडून आलो. तेव्हाही तेच मतदार होते आणि आताही तेच मतदार आहेत. उद्धव ठाकरे यांचं नाव मुख्यमंत्रिपदासाठी पुढे गेलं असतं तर चार-पाच टक्के मतदान वाढलं असतं आणि सर्वांना फायदा झाला असता". 

Maharashtra CM: स्थळ दिल्ली, मध्यरात्रीचे 12.40 अन्..; असा ठरला मुख्यमंत्री, वाचा संपूर्ण इनसाईड स्टोरी

"काँग्रेसचे लोक तर कोणतं मंत्रिपद, खातं मिळणार याच्यावर चर्चा करत होते हे सत्य आहे. मुख्यमंत्रिपदासाठी तर 10 जण इच्छुक होते. उद्धव ठाकरेंचं नाव जाहीर झालं असतं तर मतं वाढली असती. काँग्रेसला जर त्यांचा मुख्यमंत्री हवा होता तर त्यांनी नाव जाहीर करायला हवं होतं. उद्धव ठाकरेंनी तुम्ही नाव जाहीर करा, मी पाठिंबा देतो म्हटलं होतं. पण तसंही झालं नाही," असं अंबादास दानवे म्हणाले. ठाकरे बंधू एकत्र येणार का? असं विचारलं असता त्यांनी आमच्याकडे तशी चर्चा नाही असं स्पष्ट केलं. 

मनसे कोणाच्या बाजूने आणि विरोधात होते त्यांनी स्पष्ट करावं असंही त्यांनी सांगितलं आहे. तसंच फडणवीस मुख्यमंत्री व्हावे हे सुस्पष्ट नसल्याने वैचारिक गोंधळ निर्माण झाला आहे असा टोला लगावला. 

एकनाथ शिंदेंनी मुख्यमंत्रिपदावरील दावा सोडल्यासंबंधी विचारलं असता ते म्हणाले, "त्यांनी भूमिका स्पष्ट केली आहे. भाजपाने  ठरवलं तर त्यांना बहुमत मिळवता येईल. एकदा शिंदे यांना रिवार्ड मिळाला असून तो पुन्हा पुन्हा मिळणार नाही". चांगले उद्योग गुजरातला नेण्याचं काम सुरू आहे. प्रदूषण करणारे उद्योग आमच्याकडे आणले जात आहेत असा संताप त्यांनी व्यक्त केला. 

ईव्हीएमसंबंधी विचारलं असता त्यांनी याचिकेतून काहीतरी निघेल. बॅलेटवर घ्यायला का घाबरतात? जनतेच मत असेल, लोकांची इच्छा असेल तर मतदान घ्यावं अशी मागणी त्यांनी केली आहे. उद्धव ठाकरे यांच्या नेतृत्वाखाली शिवसेना उभारी घेईल. ताकदीने महाराष्ट्रासाठी लढणार आहे असा निर्धार त्यांनी व्यक्त केला आहे.