Indian Railways: रेल्वे टिकिट बुकिंगसाठी IRCTC चे नवीन नियम, जाणून घ्या

मुंबई : तुम्हीही ट्रेनने प्रवास करत असाल तर तुमच्यासाठी एक महत्त्वाची बातमी आहे. तुम्ही ट्रेनचे तिकीट ऑनलाइन घेत असाल तर रेल्वेने तिकीट बुकिंगचे नियम बदलले आहेत. इंडियन रेल्वे कॅटरिंग अँड टुरिझम कॉर्पोरेशन (IRCTC) कडून ऑनलाइन तिकीट खरेदी करणाऱ्यांसाठी आता नवीन नियम करण्यात आला आहे. नवीन नियमानुसार, आता तुम्हाला तिकीट बुक करण्यापूर्वी मोबाईल नंबर आणि ईमेल व्हेरिफिकेशन करावे लागेल. त्यानंतरच तुम्ही तिकीट बुक करू शकाल. 

नवीन रेल्वे नियम

कोरोना संसर्गामुळे, ज्या प्रवाशांनी बऱ्याच काळापासून तिकीट बुक केले नाही त्यांच्यासाठी रेल्वेने नवीन नियम केले आहेत. अशा लोकांना IRCTC पोर्टलवरून तिकीट खरेदी करण्यासाठी प्रथम त्यांचा मोबाईल नंबर आणि ईमेल सत्यापित करावा लागेल. त्यानंतरच तुम्हाला तिकीट मिळेल. 

ऑनलाइन तिकीट बुकिंग सेवा

IRCTC भारतीय रेल्वे अंतर्गत तिकिटांची ऑनलाइन विक्रीदेखील करते. प्रवासी तिकिटांसाठी या पोर्टलवर लॉगिन आणि पासवर्ड तयार करतात. या पोर्टलच्या माध्यमातून तुमचा ईमेल आयडी आणि संपर्क क्रमांक सत्यापित करून, तुम्ही टिकिटांची बुकिंग करू शकता.

कोरोनाचा कहर कमी होताच रेल्वे नियमित सुरू झाल्या आहेत. अशा स्थितीत तिकीट विक्रीही वाढली आहे. आयआरसीटीसीच्या दिल्ली मुख्यालयातील वरिष्ठ अधिकाऱ्यांनी सांगितले की, कोरोना संसर्गाची पहिली आणि दुसरी लाट आणि त्यापूर्वी पोर्टलवर निष्क्रिय असलेली खाती यांची सत्यता तपासण्यासाठी करण्यासाठी मोबाइल नंबर आणि ईमेल पडताळणीची प्रक्रिया सुरू करण्यात आली आहे.

अशा प्रकारे पडताळणी करा 

• तुम्ही IRCTC पोर्टलवर लॉग इन केल्यावर पडताळणी विंडो उघडेल.
• त्यावर आधीच नोंदणीकृत ईमेल आणि मोबाइल नंबर प्रविष्ट करा.
•  येथे डाव्या बाजूला एडिटिंग आणि उजवीकडे व्हेरिफिकेशनचा पर्याय आहे.
• संपादन पर्याय निवडून तुम्ही तुमचा नंबर किंवा ईमेल बदलू शकता.
• व्हेरिफिकेशनचा पर्याय निवडल्यावर तुमच्या नंबरवर एक OTP (वन टाइम पासवर्ड) येईल.
• OTP टाकल्यावर तुमचा मोबाईल नंबर पडताळला जातो.
• त्याचप्रमाणे ईमेलसाठीही पडताळणी करावी लागणार आहे.
• ईमेलवर प्राप्त झालेल्या OTP द्वारे याची पडताळणी केली जाते.