संतप्त शेतकऱ्यांनी मुख्यमंत्र्यांच्या गाडीवर पेंड्या फेकल्या

www.24taas.com, झी मीडिया, बुलडाणा
बुलडाणा जिल्ह्यातच गारपीटग्रस्त शेतक-यांचा संताप मुख्यमंत्र्यांना अनुभवायला मिळाला. नुकसानग्रस्त शेतक-यांनी गाडीवर हरब-याच्या पेंडी फेकल्या आणि मुख्यमंत्र्यांच्या निषेधाच्या घोषणा दिल्या.
लोणार तालुक्यात शारा या गावातल्या अरविंद डव्हळे यांच्या शेतीवर मुख्यमंत्र्यांनी दहा मिनिटं भेट दिली आणि ते परत निघाले. त्यावेळी जमलेल्या शेतक-यांनां मुख्यमंत्र्यांशी बोलायचं होतं. मात्र मुख्यमंत्री न थांबल्यामुळे संतप्त झालेल्या शेतक-यांनी त्यांची गाडी आडवायचा प्रयत्न केला.
याचवेळी पोलिसांनी गाडी पुढे काढण्याचा प्रयत्न केल्यावर शेतक-यांनी गाडीवर हरब-याच्या पेंडी फेकल्या आणि मुख्यमंत्र्यांच्या निषेधाच्या घोषणा दिल्या. त्यानंतर काही काळ रास्तारोको करण्यात आलं. वास्तविक पहूर गावात सर्वाधिक नुकसान झालंय. पण या गावाला भेटही न देता मुख्यमंत्री तिथून निघून गेले. त्यामुळे शेतकरी संतप्त झालेत.
मुख्यमंत्री पृथ्वीराज चव्हाण कालपासून गारपीटग्रस्त भागाच्या दौ-यावर आहेत. गारपीटग्रस्त शेतक-यांच्या व्य़था मुख्यमंत्र्यांनी जाणून घेतल्या. कोणाही कितीही हरकत घेतली तरी शेतक-यांना नुकसान भरपाई मिळणारच, आचारसंहितेचा अडसर नुकसान भरपाई जाहीर करताना येणार नाही, असं मुख्यमंत्र्यांनी स्पष्ट केलं.
मुख्यमंत्र्यांनी नुकसानग्रस्त मोसंबी बागांची तसेच ज्वारी आणि गव्हाच्या नुकसानीची पाहाणी करून शेतकऱ्यांशी संवाद साधला.

• इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.
• झी २४ तासला ट्विटरवर फोलो करा.