अमित शहा आणि उद्धव ठाकरेंमधील बैठक अखेर संपली

मुंबई : भाजपचे अध्यक्ष अमित शाह आणि शिवसेना पक्षप्रमुख उद्धव ठाकरे यांच्यामध्ये गेल्या 2 तासापासून सुरु असलेली बैठक संपली आहे. अमित शाह आणि उद्धव ठाकरे यांच्यामध्येच बंद दरवाज्यामध्ये ही चर्चा झाली. त्यानंतर मुख्यमंत्री देवेंद्र फडणवीस आणि आदित्य ठाकरेही या चर्चेत सहभागी झाले. नियोजीत वेळेपेक्षा दीड तास अधिक ही बैठक चालली. त्यामुळे बैठकीत नेमकी काय चर्चा झाली याबाबत उत्सूकता आहे. शिवसेना आणि भाजपमध्ये मनोमिलन होतं का हे आता पाहावं लागणार आहे. 

आगामी लोकसभाच नव्हे तर विधानसभा निवडणुकाही शिवसेनेसोबत युती करून लढवणार असल्याचा विश्वास भाजप अध्यक्ष अमित शाह यांनी झी २४ तासला दिलेल्या खास मुलाखतीत म्हटलं आहे. झी २४ तासचे मुख्य संपादक विजय कुवळेकर यांनी अमित शाह यांची मुलाखत घेतली. उद्धव ठाकरेंशी चर्चा करून नाराजी दूर करण्यात यश येणार असा विश्वासही त्यांनी या विशेष मुलाखतीत व्यक्त केला आहे. यापुढेही शिवसेनेसोबत लोकसभा-विधानसभा निवडणूक लढू असं अमित शाहंनी म्हणलं.

२०१४ सालची लोकसभा निवडणूक एकत्र लढल्यानंतर विधानसभा निवडणुकीत शिवसेना-भाजपची युती तुटली दोघांनी वेगळी निवडणूक लढवली. पण निवडणुकीनंतर पुन्हा दोघंही एकत्र आले.  २०१४ मध्ये सत्ता आल्यापासून शिवसेना आणि भाजपमध्ये वाद सुरु आहेत. भाजपवर टीका करण्याची एकही संधी शिवसेना सोडत नाही. या पार्श्वभूमीवर अमित शाह आणि उद्धव ठाकरेंची ही भेट महत्त्वाची मानली जात आहे.

संपर्क फॉर समर्थन
भाजपचे राष्ट्रीय अध्यक्ष अमित शाह मुंबई दौऱ्यावर आहेत. भाजपच्या संपर्क फॉर समर्थन या अभियानासाठी शाह मुंबईत आलेत. या लोकसंपर्क अभियान दौऱ्यासाठी मुंबईत पोहचताच अमित शाह यांनी वांद्रे इथल्या रंगशारदा सभागृहात बैठक घेतली. शाह यांच्या उपस्थितीत पार पडलेल्या या बैठकीला मुख्यमंत्री देवेंद्र फडणवीस, प्रदेशाध्यक्ष रावसाहेब दानवे आणि विनोद तावडे यांच्यासह बडे नेते उपस्थित होते. या बैठकीनंतर संपर्क फॉर समर्थन अभियानासाठी अमित शाह अभिनेत्री माधुरी दीक्षित-नेने हिच्या घरी पोहचले. यावेळी शाह यांनी माधुरी आणि तिचे पती श्रीराम नेने यांची भेट घेऊन चर्चा केली. यानंतर शाह यांनी रतन टाटा यांच्या निवासस्थानी जाऊन त्यांची भेट घेतली.