रक्तरंजित स्थानिक निवडणूक, नागपूरमध्ये एकाची हत्या

नागपूर : नागपूर जिल्ह्यातील कन्हान नगरपरिषद आणि पंचायत समिती निवडणुकीला अंतिम टप्प्यात हिंसक वळण लागलंय. शिवसेना उमेदावाराच्या नातेवाईकाची भोसकून हत्या करण्यात आली. मद्यपान करत असलेल्या काही तरूणांची शेजारच्या टेबलावर बसलेल्या गटाशी वादावादी झाली. त्यातून तिघांनी शिवसेना उमेदवाराच्या नातेवाईकाला बाटल्या भोसकून ठार केलं. 

नागपूर जिल्ह्यातील कन्हानमध्ये सोमवारी रात्री उशिरा ही घटना घडली. कन्हान नगरपरिषदेची सार्वत्रिक निवडणूक ९ जानेवारी रोजी होत आहे. प्रभाग ८ चे शिवसेना उमेदवार डायनल शेंडे यांचे नातेवाईक संजू खडसे सोमवारी रात्री एका बारमध्ये मद्यपान करत असताना बाजूच्या टेबलवर बसलेल्या तिघांशी त्यांचे वाद झाले. थोड्या वेळाने बारच्या बाहेर आल्यावर त्यांच्यात पुन्हा वाद झाले आणि तिघांनी संजू खडसे यांच्यावर चाकूने वार केले व पळ काढला. रुग्णालयात नेण्यापूर्वीच संजू खडसे यांचा मृत्यू झाला होता. पोलीस या घटनेचा अधिक तपास करत आहेत.