अडवाणींना जोडे मारुन खाली उतरवलं: राहुल गांधींचा मोदींवर हल्लाबोल

चंद्रपूर : काँग्रेस अध्यक्ष राहुल गांधी यांनी चंद्रपूरच्या प्रचारसभेत पंतप्रधान नरेंद्र मोदींवर जोरदार हल्लाबोल चढवला आहे. हिंदू धर्मात गुरूला सर्वाधिक महत्त्व असतं. अडवाणी हे नरेंद्र मोदींचे गुरू आहेत. मात्र मोदी कधीही अडवाणींसमोर हात जोडत नाहीत. एवढंच नव्हे तर मोदींनी अडवाणींना जोडे मारून स्टेजखाली उतरवलं अशा तिखट शब्दात राहुल गांधींनी मोदींवर टीका केली. राहुल गांधी हे काहीही चुकीचं बोलले नाहीत अशी प्रतिक्रिया काँग्रेसचे खासदार हुसेन दलवाई यांनी दिली आहे. तर असं काही घडलंच नसल्याचं भाजपचे प्रवक्ते केशव उपाध्ये यांनी म्हटलं आहे.

भाजपने ज्येष्ठ नेत्यांना बाजुला करत त्यांचा अपमान केला. अनेक ज्येष्ठ नेत्यांना तिकीट नाकारलं. मुरली मनोहर जोशी आणि लोकसभेच्या अध्यक्षा सुमित्रा महाजन यांनी देखील निवडणूक लढवणार नसल्याचं म्हटलं आहे. पण ही त्यांची इच्छा आहे की, त्यांना पक्षाने निवडणूक न लढवण्यास सांगितलं याबाबत आता चर्चा रंगू लागली आहे. सुमित्रा महाजन या निर्णयामुळे नाराज असल्याचं देखील म्हटलं जात आहे.