Breaking News LIVE UPDATES : विधानसभा निवडणुकीच्या धर्तीवर महाराष्ट्रात केंद्रीय चेहऱ्यांची उपस्थिती पाहायला मिळत असून, खुद्द पंतप्रधान मोदी मुंबई आणि नवी मुंबईत सभा घेणार आहेत. आजचा दिवस सभांचा आणि नेमका आणखी कोणत्या घडामोडींचा असेल? पाहा Live Updates...
14 Nov 2024, 10:04 वाजता
आज मोदींच्या तीन सभा
राज्यात आज मोदींच्या तीन जाहीर सभा पार पडणार आहे. मोदींची आज दुपारी 12 वाजता संभाजीनगरमधील चिखलठाण्यातील एमआयडीसीत जाहीर सभा पार पडणार आहे. तर दुपारी 4 वाजता नरेंद्र मोदी यांची खारघर येथे सभा होणार आहे तर संध्याकाळी 6 वाजता मोदींची शिवाजी पार्कात जाहीर सभा पार पडणार आहे. त्यांच्या सभेसाठी मुंबईतील शिवाजी पार्कात जय्यत तयारी करण्यात आलीय.
14 Nov 2024, 10:03 वाजता
84 काय वय आहे का? शरद पवारांनी केलेल्या विधानाचीच चर्चा
84 काय वय आहे का? माझं आणखी 16 वं जायचं आहे, असं मिश्किल विधान शरद पवारांनी केलंय. पिंपरीतल्या सभेत शरद पवारांच्या वयाचा उल्लेख झाला. त्यानंतर त्यांनी आपण थकलो नाही तर तरुण आहोत, असं म्हटलंय. दरम्यान, माझं वय झालं नाही, मी अजूनही खूप वर्ष काम करू शकतो असं विधान बारामतीत अजित पवारांनी केलं होतं.
14 Nov 2024, 10:02 वाजता
संतोष बांगर यांच्याविरोधात गुन्हा...
हिंगोलीच्या कळमनुरी मतदारसंघात उद्धव ठाकरे शिवसेनेचे उमेदवार डॉ. संतोष टारफे यांचा प्रचार करण्यासाठी वाकोडी भागात गेलेल्या कार्यकत्याला महायुतीचे उमेदवार संतोष बांगर यांच्या कार्यकर्त्यांनी गाडी आडवत मारहाण करीत गाडीच्या काचा आणि कार्यकर्त्यांच्या मोबाईलची तोडफोड केली होती. त्या घटनेनंतर शिवसेना ठाकरे गट आक्रमक झाला होता, कळमनुरी पोलीस स्टेशनमध्ये ठाकरे गटाने ठिय्या आंदोलन करीत आरोपींवर गुन्हा दाखल करण्याची मागणी केली होती. त्यांनतर मारहाण झालेल्या नितीन डुकरे या कार्यकर्त्याच्या फिर्यादीवरून आमदार संतोष बांगर यांच्या दहा कार्यकर्त्यावर मारहाण आणि गाड्यांची तोडफोड करून मोबाईल फोडल्या प्रकरणी गुन्हा दाखल करण्यात आला आहे.
