Paytm, GPay, Bhim App वापरताय? मग चुकूनही या गोष्टी करु नका, नाहीतर व्हाल कंगाल

मुंबई : सध्या संपूर्ण भारत डिजिटायजेशनच्या दिशेने वाटचाल करत आहे. कोरोना काळापासून तर याचा वापर मोठ्या प्रमाणात वाढला आहे. अगदी कोणतंही बिल भरण्यापासून ते तिकीट बुक करण्यापर्यंत, तसेच रेस्टोरेंटचं बिल भरण्यापर्यंत आपण सगळ्याच गोष्टींसाठी  UPI ऍप किंवा नेट बँकिंग वापरतो. शिवाय हल्ली किराणा दुकान किंवा अगदी भाजीवाला देखील हा पर्याय सगळ्यांना देऊ लागला आहे. त्यामुळे लोक मोठ्या खर्चापासून ते अगदी छोटया खर्चापर्यंत UPI अॅपचाच वापर करतात. एवढेच नाही तर या पद्धतींद्वारे आपण पैसे हस्तांतरित किंवा प्राप्त करतो, ज्यामुळे आपले जीवन सोपे होते आणि वेळेची बचत देखील होते. लोक यासाठी Paytm, GPay, Bhim App यासारख्या विविध ऍपचा वापर करतात. तुम्ही देखील त्यांपैकी एक असाल, तर तुमच्यासाठी एक महत्वाची बातमी समोर आली आहे.

त्यामुळे तुम्ही कोणतेही डिजिटल पेमेंट ऍप वापरत असाल (मग Google Pay असो किंवा PhonePe किंवा Paytm), तर या गोष्टी नक्कीच लक्षात ठेवा, ज्यामुळे तुम्हाला फसवणूक टाळता येईल आणि सुरक्षित पेमेंट देखील करता येईल:

UPI पेमेंट करताना या गोष्टी लक्षात ठेवा

1. तुमचे UPI ऍप अपडेट ठेवा

सायबर गुन्हेगारांपासून स्वतःला सुरक्षित ठेवण्यासाठी तुम्ही तुमचे UPI ऍप वेळोवेळी अपडेट करत राहावे. सायबर सुरक्षा वाढवण्यासाठी, कंपन्या प्रत्येक अपडेटसह नवीन वैशिष्ट्ये प्रदान करतात. अशा परिस्थितीत UPI ऍप नेहमी अपडेट ठेवा.

2. पेमेंट प्राप्त करण्यासाठी कधीही पिन प्रविष्ट करू नका

कोणत्याही UPI ऍपमध्ये, पैसे मिळवण्यासाठी वापरकर्त्याला त्याचा/तिचा पिन प्रविष्ट करण्याची आवश्यकता नाही. त्यामुळे, तुम्हाला कोणाकडून पैसे घ्यायचे असल्यास तुम्हाला त्यामध्ये पिन नंबर टाकण्याची गरज नाही.

3. फसवणूक कॉलपासून सावध रहा

सायबर गुन्हेगार लोकांना फक्त लिंक पाठवून पैसे चोरण्याचा प्रयत्न करत नाहीत तर ते वापरकर्त्यांना थेट कॉल करून त्यांचा पासवर्ड, पिन इत्यादी विचारतात. लक्षात ठेवा की कोणत्या ही बँका कॉलवर असे तपशील विचारत नाहीत. त्यामुळे अशा कोणत्याही कॉलला तुम्ही बळी पडू नका.

4. कोणत्याही प्रकारच्या लिंकवर क्लिक करू नका आणि पिन टाकू नका

आजकाल लोकांना मेल आणि व्हॉट्सऍपवर विशेषत: सणासुदीच्या काळात आकर्षक ऑफर्स मिळतात. अशा लिंक्स तुम्हाला 'गिफ्ट' किंवा 'कॅशबॅक' प्राप्त करण्यासाठी तुमचा पिन आणि इतर तपशील प्रविष्ट करण्यास सांगतात. त्यामुळे अशा लिंक्सची काळजी घ्या आणि त्या उघडू नयेत.

5. मजबूत पासवर्ड तयार करा

UPI सेवेसाठी नोंदणी करताना स्ट्राँग पिन सेट करा. एक असा पिन तयार करा, ज्याचा कोणीही सहज अंदाज लावू शकत नाही. UPI पिनमध्ये सहसा चार किंवा सहा अंक असतात.