झटपट श्रीमंतीची हौस नडली, अखेर हातात बेडी पडली! तब्बल 100 कोटींच्या घोट्याळ्याचा पर्दाफाश

Delhi Police : दिल्ली गुन्हे शाखेने गुरुवारी 100 कोटी रुपयांहून अधिकची फसवणूक केल्याप्रकरणी सीमा सुरक्षा दलाच्या (BSF) माजी स्वयंपाक्याला दिल्लीतील रोहिणी परिसरातून अटक केली. पोलिसांनी दिलेल्या माहितीनुसार, 38 वर्षीय आरोपी 2004 ते 2006 या काळात बीएसएफमध्ये होता.

दिल्ली पोलिसांच्या गुन्हे शाखेने राजस्थानमध्ये 100 कोटींहून अधिक रुपयांच्या फसवणुकीत सहभागी असलेल्या आरोपींना अटक केली आहे. पोलिसांच्या नोंदीनुसार हा गुन्हेगार 46 गुन्ह्यांमध्ये वाँटेड होता आणि त्याच्यावर एकूण 59 फसवणुकीचे गुन्हे दाखल आहेत. 

ओमराम उर्फ ​​राम मारवाडी असे पोलिसांनी पकडलेल्या या आरोपीचे नाव असून तो जोधपूरचा रहिवासी आहे.

श्रीमंत होण्यासाठी सोडली बीएसएफची नोकरी 

आरोपी ओमराम फक्त बारावीपर्यंत शिकलेला आहे आणि त्याने 2004 ते 2006 दरम्यान बीएसएफमध्ये स्वयंपाकी म्हणून काम केले आहे. लवकरात लवकर श्रीमंत होण्यासाठी त्याने बीएसएफची नोकरी सोडली. यानंतर आरोपींनी राजस्थानमधील जयपूरमध्ये सुरक्षा एजन्सी उघडली होती. 

सुमारे 60 जणांना नोकऱ्या लावून दिल्यानंतर त्याने एजन्सी दुसऱ्याला विकून स्वत:ची मार्केटिंग कन्सल्टन्सी कंपनी स्थापन करून नवीन व्यवसाय सुरू केला.

नवीन कंपन्या उघडून फसवणूक

आरोपी फसवणूक करून एकामागून एक बंद करत नवीन कंपन्या उघडत राहिला. ओमरामने एमआयएम नावाने मार्केटिंग फर्म सुरू केली होती ज्यामध्ये 4000 रुपये देण्याच्या बदल्यात कमिशन देण्याचा दावा केला होता. 

वर्षभरात हजारो सभासद बनवून सुमारे 100 कोटींची फसवणूक करून तो फरार झाला होता. त्याचप्रमाणे, 2021 मध्ये, आरोपीने ई-कॉमर्स प्लॅटफॉर्मद्वारे लोकांची फसवणूक केली होती.

2020 मध्ये बलात्कार प्रकरणात ओमरामलाही अटक करण्यात आली होती. राजस्थान पोलिसांनी त्याच्या अटकेसाठी बक्षीसही जाहीर केले आहे. पोलिसांचे पथक जवळपास सहा महिने त्याची चौकशी करत होते. 

पोलीस उपायुक्त विचित्र वीर यांनी दिलेल्या माहितीनुसार, ओमराम रोहिणी परिसरात येणार असल्याची माहिती गुन्हे शाखेच्या पथकाला मिळाली होती. त्यानंतर पोलिसांनी सापळा रचून त्याला अटक केली.