वाटाणे पुलाव खाऊन कंटाळा आला असेल, तर एकदा हा पुलाव नक्की बनवुन पाहा

मुंबई : भारतीयांना त्यांच्या जेवणात भात खायला खुप आवडतो. त्यामुळे लोकांच्या जेवणात भात हा आढळतोच. बऱ्याच लोकांचे भाताशिवाय पोट देखील भरत नाही. परंतु तोच तोच साधा भात खायला देखील लोकांना कंटाळा येतो, ज्यामुळे लोकं काही तरी चवीला वेगळं खायला मिळतंय का? किंवा भातामध्ये आणखी वेगळं काय काय बनवता येईल हे शोधत असतात. शक्यतो आपण भात-डाळ, भात-आमटी, पुलाव-भात, बिर्याणी असे भाताचे काहीतरी पदार्थ बनवून खातो. परंतु ते देखील खाऊन तुम्हाला कंटाळा आला असेल, तर आम्ही तुमच्यासाठी एक नवीन रेसिपी आणली आहे. ती तुम्ही एकदा तुमच्या जेवणात बनवुन पाहा.

शिमला मिर्च पुलाव एक स्वादिष्ट डिश आहे. ही स्वादिष्ट पुलाव रेसिपी बासमती तांदूळ, शिमला मिर्च आणि भारतीय मसाल्यांच्या मिश्रणाने बनवली आहे. चव वाढवण्यासाठी त्यात ब्रोकोलीचा वापर देखील केला जातो. तुम्ही ते कोणत्याही विशेष प्रसंगी बनवू शकता किंवा तुम्ही हा पुलाव टिफिनमध्येही घेऊन जाऊ शकता.

हा भात तुम्ही करी किंवा आपल्या आवडीच्या कोणत्याही ग्रेव्हीसह खाऊ शकता. जर तुम्हाला जीरा भात आणि मटर पुलाव खाण्याचा कंटाळा आला असेल, तर तुम्ही ही रेसिपि वापरून पाहू शकता.

रेसिपिसाठी लागणारे साहित्य

बासमती तांदूळ - 2 कप
काळी मिरी - 1 टीस्पून
लवंगा - 4
रिफाइंड तेल - 4 चमचे
ब्रोकोली - 1 कप
हिरवी वेलची - २
पाणी - 6 कप
शिमला मिरची (हिरवी मिरची) - 2 कप
लसूण - 4 पाकळ्या
जिरे - 2 टीस्पून
दालचिनीची काठी अर्धा इंच
काजू - 4-5 तुकडे
आवश्यकतेनुसार मीठ
1/4 टीस्पून गरम मसाला पावडर
सजवण्यासाठी कोथंबीर - कांद्याची पात - 1 मूठ

कसे बनवावे?

स्टेप - 1 तांदूळ भिजवायला ठेवा आणि काजू-लसणाची पेस्ट बनवा

ही पुलाव रेसिपी बनवण्यासाठी, बासमती तांदूळ धुवून 20 मिनिटे भिजवा. यानंतर, मिक्सरच्या भांड्यात काजू, सोललेल्या लसणाच्या पाकळ्या, काळी मिरी टाकून बारीक वाटून घ्या. आपण इच्छित असल्यास, आपण त्यात थोडे पाणी घालू शकता.

स्टेप - 2 संपूर्ण मसाल्यांसह तांदूळ शिजवा

यानंतर, मध्यम आचेवर एक मोठा पॅन ठेवा आणि त्यात पाणी घाला. पाण्याला उकळी आल्यावर त्यात तांदूळ घाला. नंतर, तांदळामध्ये मीठ, हिरवी वेलची, दालचिनीची काठी, लवंगा घालून भात मऊ होईपर्यंत शिजवा. तांदूळ शिजल्यावर जास्त पाणी काढून टाका आणि त्याला बाजूला ठेवा.

स्टेप - 3 पुलाव साठी मसाला तयार करा

आता मध्यम आचेवर एक पॅन ठेवा आणि त्यात तेल गरम करा. तेल पुरेसे गरम झाल्यावर त्यात जिरे घाला. बिया तडतडल्यावर काजू-लसूण पेस्ट घालून एक मिनिट तळून घ्या.

स्टेप - 4 भाजी मसाल्यात शिजवा

मसाला भाजल्यावर त्यात चिरलेली शिमला मिरची आणि ब्रोकोलीचे तुकडे घाला. 2 मिनिटे ढवळत त्यांना शिजवा आणि त्यात लगेच गरम मसाला पावडर आणि मीठ घाला आणि 2-3 मिनिटे शिजवा.

स्टेप - 5 तुमचा पुलाव तयार

आता भाज्यांमध्ये शिजवलेले तांदूळ घालून चांगले मिक्स करावे. सर्व साहित्य चांगले मिसळा आणि 2-5 मिनिटे शिजवा. पुलाव तयार झाल्यावर त्याला कांद्याच्या पातीने आणि कोथंबीर टाकून सजवा आणि गरम गरम सर्व्ह करा. तुम्ही हा पुलाव तुमच्या आवडीच्या कोणत्याही भाजीबरोबर खाऊ शकता.