मगरींनी घेरूनही 'तो' चोर सहीसलामत सुटला

मुंबई : ठिकाण... चिपळूणच्या गांधारेश्वर मंदिराचा निसर्गरम्य परिसर... वशिष्ठी नदीच्या तीरावर वसलेलं टुमदार शंकर मंदिर आणि नदी किनाऱ्यावरचा घाट... घाटाच्या एका कोपऱ्यात असलेल्या जांभळाच्या डेरेदार वृक्षाची एक भली मोठी फांदी वीस-पंचवीस फूट उंचावरून नदीपात्रात हेलकावे घेत होती... आणि त्या फांदीवर एक तरूण घाईघाईने आणि महत्प्रयासाने वर चढून बसला होता.

पाण्यात मगरींच्या हालचाली

आधीच गावात चोर शिरल्याची कुजबुज होती. त्यात त्या फांदीवर घाईघाईने चढणारा तरूण पाहून, तोच चोर असल्याची काही जणांनी आवई उठवली आणि बघता बघता घाटावर गर्दी झाली. इतकं असूनही एक पर्यटक तरूणी खाली नदीत एका नावेतून मुक्त विहार करत होती. त्या तरूणाचे हावभाव काही वेगळेच होत होते. त्या तरूणीकडे पाहून तो संवाद साधणार इतक्यात... एका गावकऱ्याने 'ती फांदी कमकुवत असून तो केव्हाही खाली पडेल आणि पाण्यात मगरी असल्याचे ओरडून सांगितले. झालं! त्या तरूणाच्या काळजात धस्सं झालं. मदतीच्या अपेक्षेने तो साद घालणार... इतक्यात 'कट ईट' असा जोरदार आवाज आला.

गावकऱ्याच्या नजरा मागे वळल्या... दूरवर एका उंचवट्यावरून तो आवाज आला होता. तेव्हा गावकऱ्यांना समजले की तिथे 'चरणदास चोर' चित्रपटाची शुटींग सुरू आहे. तो झाडावर चढलेला तरूण, चित्रपटाचा मुख्य नायक 'चरण' म्हणजे अभय चव्हाण आणि पाण्यात नावेत विहार करणारी तरूणी म्हणजे अभिनेत्री सोनम पवार होती. दिग्दर्शक श्याम महेश्वरी यांनी सर्वांना शांत राहण्याचे आवाहन केले. मगर नावेच्या जवळ येऊ नये म्हणून काही गावकरी दुसऱ्या नावेतून पाण्यात उतरले आणि सीन पुन्हा सुरू झाला.

शुटिंग कसं पूर्ण करणार?

सायलेन्स... रेडी... रोल कॅमेरा... ॲन्ड ॲक्शन! असा आदेश झाला. झाडावर बसलेल्या अभयची पुन्हा बोलती बंद झाली. खरंच नदीपल्याड किनाऱ्यावर एक मगर हालचाल करताना त्याला दिसली. पण, तो काहीही बोलला नाही. दिग्दर्शकाच्या ही गोष्ट लक्षात आली. कारण, कॅमेऱ्यातून ती मगर स्पष्टपणे दिसत होती. तो सीन कसाबसा पूर्ण झाला. उर्वरीत सीनसाठी 'चरण' म्हणजे अभय चव्हाणला पाण्यात उतरायचे होते. आता, मात्र खरी पंचायत होती. रोमॅन्टिक सीन होता. सीन पूर्ण करणं गरजेचं होतं. दिग्दर्शक श्याम माहेश्वरी व क्रीएटिव्ह दिग्दर्शक संजू होलमुखे दोघांनी मगरींची चाहूल घेण्यासाठी कॅमेऱ्यात कुठेही दिसणार नाही, अशा पद्धतीने नावेभोवती गावकरी आणि प्रोडक्शन टीमचे कडे निर्माण केले. नायिका सोनम पवार बिनधास्त होती कारण ती पूर्णपणे अनभिज्ञ होती. पण, अभय चव्हाणची मात्र पाचावर धारण बसली होती. त्यात रोमॅन्टिक सीन... अशा अवस्थेत रोमॅन्टिक अभिनय करायचा तरी कसा? असा त्याला प्रश्न पडला. रिटेकवर रिटेक होऊ लागले. 'झक मारली, आणि हा चित्रपट स्विकारला!' अशा भावनेतून कसाबसा अभयने सीन पूर्ण केला.

...आणि सुटका झाली!

पाण्यातून लवकर बाहेर पडण्यासाठी सर्वच जण नाव जोरात हाकू लागले. इतक्यात, तीन लहान मगरी पाण्यावर तरंगताना दिसल्या. पण, त्या मगरींची काहीच हालचाल नव्हती. हे पाहून, कसेबसे सर्व जण पाण्याबाहेर आले आणि संपूर्ण टीमने सुटकेचा निश्वास टाकला. पाण्याबाहेर आल्यावर अभयने हा सर्व प्रकार अभिनेत्री सोनमला सांगितला. तेव्हा तिची प्रतिक्रीया ऐकून सर्वानाच हसू फुटलं... 'कदाचित, मगरींचं जेवण झालेलं असावं आणि त्यांना समजलं असेल तू खरा चोर नाहीस ते...' 

अशा रीतीने मगरींच्या तावडीतून चरणदास चोर आणि चोरनी दोघेही बचावले. कोकणच्या निसर्गसंपन्न वातावरणात चित्रीत झालेला, युनिट प्रोडक्शन निर्मित खुमासदार विनोदी चरणदास चोर हा चित्रपट येत्या २९ डिसेंबर रोजी महाराष्ट्रभर प्रदर्शित होत आहे.