Deaf And Dumb Actress Works In 59 Films Who Is She?: తెలుగు చిత్ర పరిశ్రమతోపాటు దక్షిణాది భాషల్లో ఓ దివ్యాంగ హీరోయిన్ సినిమాల్లో రాణిస్తోంది. అగ్ర హీరోలతోనూ నటిస్తూ మెప్పిస్తోంది. ఆమె మహేశ్ బాబుకు చెల్లిగా.. జూనియర్‌ ఎన్టీఆర్‌కు అక్కగా నటించి గుర్తింపు తెచ్చుకుంది. ఆమెకు మాటలు రావు.. చెవులు వినపడవు. కానీ సినిమాల్లో సత్తా చాటుతున్న ఆ హీరోయిన్ గురించి తెలుసుకుందాం.
సినీ పరిశ్రమలో శారీరకంగా ఫిట్‌గా.. అందంగా ఉన్నా కూడా అవకాశాలు దొరకవు. అలాంటిది దివ్యాంగురాలు సినిమాల్లో హీరోయిన్‌కు సమానంగా నటిస్తున్న ఓ హీరోయిన్ ఉంది తెలుసా? ఆమె ఎవరో బుర్రకు పదును పెట్టండి.
ఆమెకు నోటి నుంచి మాటలు రావు. కానీ చక్కగా హావభావాలు పలికిస్తుంది. ఆమెకు చెవులు వినిపించవు. కానీ అందంగా నవ్వుతూ సినిమాల్లో అందరి దృష్టిని ఆకర్షిస్తోంది. బధిర హీరోయిన్ ఎవరో కాదు అభినయ.
సీతమ్మ వాకిట్లో సిరిమల్లె చెట్టు సినిమాలో వెంకటేశ్‌, మహేశ్ బాబు సోదరిగా అభినయ నటించారు. ఆమె పెళ్లి సన్నివేశాలు ఆ సినిమాలో హైలెట్‌గా నిలిచాయి. జూనియర్‌ ఎన్టీఆర్ 'దమ్ము' సినిమాలో అక్క పాత్రలో అభినయ మెరిశారు.
తెలుగుతోపాటు దక్షిణ భాషల్లో రాణిస్తున్న అభినయ తమిళనాడుకు చెందింది. ఆమెకు పుట్టుక నుంచే చెవులు వినపడవు. మాటలు కూడా రాలేదు. బధిర యువతిగా ఉన్నా కూడా అందంగా ఉండడంతో తల్లిదండ్రులు ఆమెను నటనలో ప్రోత్సహించారు.
నటనలో రాణించేందుకు తల్లిదండ్రులు చాలా కష్టపడ్డారు. పరిశ్రమలో ఈ స్థాయిలో ఉండడానికి కుటుంబసభ్యులే కారణమని పలు ఇంటర్వ్యూల్లో తన సైగల ద్వారా అభినయ తెలిపింది.
రవితేజ-పూరి జగన్నాథ్‌ కాంబినేషన్‌లో వచ్చిన 'నేనింతే' సినిమాతో తెలుగు పరిశ్రమకు అభినయ పరిచయమైంది. అనంతరం చాలా సినిమాల్లో ఆమె నటించింది. 18 ఏళ్లుగా చిత్ర పరిశ్రమలో కొనసాగుతున్న అభినయ ఇప్పటివరకు దాదాపు 60 సినిమాలు చేసింది.
శంభో శివ శంభో, కింగ్‌, ఢమరుకం, జీనియస్‌, రాజుగారి గది 2, ధ్రువ, సీతారామం, గామి, ఫ్యామిలీ స్టార్‌ వంటి సినిమాలతోపాటు మరికొన్నింటిలో అభినయ నటించి ప్రేక్షకుల అభిమానం పొందింది.
ప్రస్తుతం మలయాళంలో ఓటీటీలో విడుదలైన 'పని' అనే సినిమాలో అభినయ నటించింది. జోజూ జార్జ్‌ నటించిన ఈ సినిమాలో అభినయ నటించిన ఓ సన్నివేశం వివాదాస్పదం కావడంతో మరోసారి అభినయ ప్రేక్షకుల దృష్టిలో పడింది.
