UNGA ने रशियाला फटकारलं, यूक्रेनने जाहीर केला मृतांचा आकडा

नवी दिल्ली : युक्रेन आणि रशिया यांच्यातील युद्धाच्या पार्श्वभूमीवर संयुक्त राष्ट्र महासभेच्या आपत्कालीन बैठकीत संयुक्त राष्ट्राचे सरचिटणीस अँटोनियो गुटेरेस म्हणाले की, युद्ध कोणत्याही परिस्थितीत थांबले पाहिजे. युक्रेनमध्ये रशियाने केलेल्या लष्करी कारवायांमध्ये वाढ झाल्याने मानवी हक्कांचे उल्लंघन वाढले आहे.

गुटेरेस यांचा रशियावर संताप

ते म्हणाले की, रशियन अण्वस्त्रांना हाय अलर्टवर ठेवणे हा संघर्ष वाढवणारं पाऊल आहे आणि आण्विक युद्धाची कल्पनाही करता येत नाही. युक्रेन आणि रशिया यांच्यातील चर्चेचा परिणाम हा संघर्ष थांबवण्याच्या स्वरूपात फलदायी ठरेल, अशी आशा त्यांनी व्यक्त केली. "आम्ही युक्रेनसाठी एक शोकांतिका, तसेच आपल्या सर्वांवर संभाव्य विनाशकारी परिणामांसह मोठ्या प्रादेशिक संकटाचा सामना करत आहोत".

संयुक्त राष्ट्र मानवाधिकार प्रमुख मिशेल बॅचेलेट यांनी सांगितले की, गुरुवारपासून सुरू असलेल्या या लढाईत सात युक्रेनियन मुलांसह 102 नागरिकांचा मृत्यू झाला असून 304 जण जखमी झाले आहेत. यूएनच्या आकडेवारीचा हवाला देत ते म्हणाले की, गेल्या काही दिवसांत 4.20 लाखांहून अधिक लोकांनी देश सोडला आहे. बॅचेलेट यांनी सोमवारी सांगितले की बहुतेक नागरिकांचा मृत्यू तोफखाना, रॉकेट आणि हवाई हल्ल्यांसह स्फोटांमुळे झाला आहे.

युक्रेनमध्ये 16 मुलांचा मृत्यू

UNGA च्या आपत्कालीन बैठकीत युक्रेनच्या प्रतिनिधीने सांगितले की, युक्रेनमध्ये 16 मुलांसह 352 लोकांचा मृत्यू झाला आहे. रशियाकडून गोळीबार सुरू असल्याने मृतांची संख्या सातत्याने वाढत असल्याचा दावा त्यांनी केला. दुसरीकडे, रशियाच्या हल्ल्यात युक्रेनच्या 16 मुलांचा मृत्यू झाल्याचं युक्रेनच्या राष्ट्राध्यक्षांनी म्हटलं आहे.

पाश्चिमात्य देशांनी रशियावर लादलेल्या निर्बंधांचे कौतुक करताना ते म्हणाले की, यामुळे रशियाचे चलन घसरले आहे. झेलेन्स्की म्हणाले की, युक्रेनला तात्काळ ईयू सदस्यत्व मिळायला हवे. 4,500 हून अधिक रशियन सैनिक मारले गेल्याचा दावा त्यांनी केला. त्याने रशियन सैनिकांना शस्त्रे टाकून निघून जाण्यास सांगितले.

रशियाचे स्पष्टीकरण

रशियाचा दावा आहे की रशियन सैन्याने युक्रेनमधील लोकसंख्या असलेल्या भागांना लक्ष्य केले नाही, जरी रशियन हल्ल्यांमुळे निवासी इमारती, शाळा आणि रुग्णालये नष्ट झाल्याचे पुरावे आहेत. क्रेमलिनचे प्रवक्ते दिमित्री पेस्कोव्ह यांनी सोमवारी आरोप केला की उजव्या विचारसरणीच्या युक्रेनियन राष्ट्रवादी गटांच्या सदस्यांनी नागरिकांचा ढाल म्हणून वापर करून आणि लोकसंख्या असलेल्या भागात लष्करी उपकरणे तैनात करून नागरिकांची हत्या केली.