भारतावरुन भिडले सौदी अरेबिया आणि रशिया, पाहा काय आहे प्रकरण

मुंबई : भारतामध्ये स्वस्त तेल विकण्यासाठी रशियाला सौदी अरेबिया आणि इतर ओपेक देशांकडून कठीण स्पर्धेला सामोरे जावे लागत आहे. सौदी अरेबियाच्या तुलनेत रशियाने भारताला स्वस्त तेल विकले आहे. यामुळे जगातील सर्वात मोठा तेल आयातदार भारतातील रशियाचा बाजारातील हिस्सा वाढला आहे.

भारत सरकारच्या आकडेवारीवर आधारित ब्लूमबर्गच्या अहवालानुसार, या वर्षी एप्रिल ते जूनपर्यंत रशियाने सौदी अरेबियाच्या तुलनेत भारताला स्वस्त तेल विकले आहे. मे महिन्यात भारताला रशियन तेलावर प्रति बॅरल $19 पर्यंत सूट मिळत होती.

जूनमध्ये सौदी अरेबियाला मागे टाकत रशिया भारताला तेल निर्यात करणारा दुसरा सर्वात मोठा देश बनला. या बाबतीत इराक पहिल्या क्रमांकावर आहे. युक्रेनवर रशियाच्या हल्ल्यानंतर युरोपीय देशांनी रशियावर घातलेल्या निर्बंधांदरम्यान भारत आणि चीन सर्वाधिक प्रमाणात रशियन कच्च्या तेलाची खरेदी करत आहेत. भारत आपल्या तेलाची गरज भागवण्यासाठी 85 टक्के हिस्सा आयात करतो. 

रशियाकडून स्वस्त दरात तेल मिळाल्याने भारताला आर्थिक आघाडीवर थोडा दिलासा मिळाला आहे कारण देशात महागाई शिगेला पोहोचली आहे आणि व्यापार तूट वाढली आहे.

सरकारी आकडेवारीनुसार, जागतिक तेलाच्या किमती वाढल्यानंतर, या वर्षाच्या दुसऱ्या तिमाहीत भारताचे कच्च्या तेलाचे आयात बिल मागील वर्षीच्या याच तिमाहीत $25.1 अब्जच्या तुलनेत वाढून $47.5 अब्ज झाले आहे.

सौदी अरेबियाच्या तुलनेत भारताला रशियाकडून तेल आयातीमध्ये देण्यात आलेली सूट जून महिन्यात कमी झाली आहे. असे असूनही सौदी अरेबियापेक्षा भारताला रशियाकडून प्रति बॅरल 13 डॉलर स्वस्त तेल मिळत आहे.

सौदी अरेबिया 2021 मध्ये भारताला तेल निर्यात करणारा दुसरा सर्वात मोठा देश होता, तर रशिया नवव्या क्रमांकावर होता. इराक हा भारतातील सर्वात मोठा तेल निर्यात करणारा देश आहे आणि या वर्षी जूनपर्यंत तो प्रथम क्रमांकावर आहे.

मे महिन्यात सौदी अरेबियाकडून भारताला रशियापेक्षा $9 प्रति बॅरल महाग तेल मिळाले होते, परंतु उर्वरित महिन्यात सौदी अरेबियाने भारताला तेल खरेदीवर काही सूट दिली. मार्चपासून रशियाकडून भारताची तेल आयात दहापट वाढली आहे.