राष्ट्रवादीचे ज्येष्ठ नेते गोविंदराव आदिक यांचं निधन, दुपारी अंत्यसंस्कार

मुंबई: राष्ट्रवादी काँग्रेसचे ज्येष्ठ नेते गोविंदराव आदिक यांचं अल्पशा आजारानं निधन झालं. ते ७६ वर्षांचे होते. फुफ्फुसांच्या जंतु संसर्गानं ग्रस्त असलेले गोविंदराव आदिक गेल्या ८ दिवसांपासून बॉम्बे हॉस्पिटलमध्ये उपचार घेत होते. 

शनिवारी आदिकांची तब्येत अचानक खालावल्यानं ते उपचारांनाही प्रतिसाद देत नव्हते. अखेरीस रात्री त्यांची प्राणज्योत मालवली. गोविंदराव आदिक यांचं पार्थिव सकाळी ९ वाजता श्रीरामपूर इथं अंत्यदर्शनासाठी ठेवण्यात येणार असून, दुपारी ४ वाजता श्रीरामपूर तालुक्यातील अशोकनगर इथल्या पब्लिक स्कूलच्या आवारात अंत्यसंस्कार करण्यात येणार आहेत. 

तब्बल ४५ वर्ष राजकारणात सक्रिय असलेल्या गोविंदराव आदिकांनी वर्षभरापूर्वी राजकारणातून निवृत्ती घेतली होती.  

गोविंदराव आदिक यांचा अल्प परिचय:
 
- गोविंदराव आदिक काँग्रेसमध्ये असताना शरद पवार यांचे समर्थक नंतर काँग्रेस एसमध्ये सहभागी झाले.
 
- १९८० मध्ये पुन्हा काँग्रेसमध्ये गेले, काँग्रेस प्रदेशाध्यक्षपद भूषविले.
 
- राज्यसभेचे माजी खासदार
 
- २ वेळा काँग्रेसचे आमदार, महाराष्ट्रात काही काळ कृषिमंत्री होते.
 
- २००९ला काँग्रेसमधून राष्ट्रवादी काँग्रेसमध्ये गेले.

* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.

* झी २४ तासला ट्विटरवर फोलो करा.