अमित ठाकरेंची कोरोनावीरांच्या कामाला सलामी

देवेंद्र कोल्हटकर,, झी मीडिया, मुंबई : कोरोनाच्या या कठीण काळात डॉक्टर, सरकारी कर्मचारी,आरोग्य कर्मचारी, शेतकरी,पत्रकार करत असलेल्या कामाला सलाम आहे. त्याचप्रमाणे या संकटाच्या काळात स्वतःच्या जीवावर उदार होऊन,व्यक्तिगत अडचणी, दुःख बाजूला सारत लोकांसाठी धावून जाणाऱ्या हजारो, लाखो ज्ञात, अज्ञातांच्या कामाला सलाम..  असं म्हणत मनसे नेते अमित ठाकरेंनी कोरोनावीरांच्या कामाला सलामी दिली आहे. या संकट प्रसंगी महाराष्ट्रातल्या विविध भागात मनसे कार्यकर्ते काम करत आहेत. मनसेने कामासंबंधीचा व्हिडिओ सोशल मीडियावर देखील पोस्ट केला आहे. यावेळी अमित ठाकरे यांनी व्हिडिओच्या माध्यामातून संवाद देखील साधला आहे. 

लॉकडाऊन मुळे हाल होत असलेल्या प्राणी पक्षी यांना ही मदत  करण्याचे आवाहन त्यांनी केले आहे. त्याचप्रमाणे कृष्णकुंज शिवाजी पार्क, दादर येथे मनसे नेते अमित राज ठाकरे यांनी महाराष्ट्रातील डॉक्टरांसाठी पीपीई किट्स, मास्क आदी साहित्य डॉक्टरांची नामांकित संस्था असलेल्या मार्डचे अध्यक्ष राहुल वाघ आणि त्यांच्या टीमकडे स्वाधीन केले.

यावेळी मनसे नेते नितीन सरदेसाई आणि विविध रुग्णालयातील डॉक्टर  उपस्थित होते. त्यानंतर निवासी डॉक्टरांच्या मार्ड संघटनेने पत्रक काढून मनसे नेते अमित ठाकरे यांचे आभार देखील मानले आहेत.