राकेश झुनझुनवाला यांना शेअर मार्केटमध्ये फटका, आठवडाभरात हजारो कोटींचे नुकसान!

Rakesh Jhunjhunwala Portfolio: संपूर्ण जगावर मंदीचं सावट असल्याने अनेक देशांच्या शेअर बाजारावर पडसाद जाणवत आहेत.या घसरणीचा परिणाम भारतीय शेअर बाजारावरही दिसून येत आहे. त्यामुळे गुंतवणूकदारांचेही मोठे नुकसान होत आहे. भारतीय शेअर बाजारातील बड्या गुंतवणूकदारांपैकी एक असलेल्या राकेश झुनझुनवाला यांच्या पोर्टफोलिओवरही परिणाम झाला असून त्यांनाही मोठा फटका बसला आहे. राकेश झुनझुनवाला यांनी विकत घेतलेल्या टायटन कंपनी आणि स्टार हेल्थ अँड अलाईड इन्शुरन्स कंपनीच्या शेअर्संना गेल्या आठवड्यात मोठा फटका बसला. टायटनच्या शेअरची किंमत गेल्या आठवड्यात प्रति शेअर 108.75 रुपयांनी घसरली. पाच ट्रेडिंग सत्रांमध्ये 2,053.50 रुपयांवरून 1,944.75 रुपये प्रति शेअर घसरली.

इतके कोटी टायटनमध्ये बुडाले

टायटन कंपनीनुसार, राकेश झुनझुनवाला यांच्याकडे टायटनचे 3,53,10,395 शेअर्स आहेत. तर त्यांची पत्नी रेखा झुनझुनवाला यांच्याकडे जानेवारी ते मार्च 2022 या कालावधीत 95,40,575 शेअर्स आहेत. राकेश झुनझुनवाला आणि त्यांची पत्नी रेखा झुनझुनवाला यांच्याकडे टायटनचे एकूण 4,48,50,970 शेअर्स आहेत. त्याची किंमत गेल्या आठवड्यात प्रति शेअर 108.75 रुपयांनी घसरली. टायटनच्या शेअरमध्ये घसरण झाल्यामुळे राकेश झुनझुनवाला यांच्या संपत्तीत सुमारे 485 कोटी रुपयांची घट झाली आहे.

स्टार हेल्थ अँड अलाईड इन्शुरन्सच्या शेअर्समध्येही नुकसान

स्टार हेल्थच्या आणखी एका शेअरमध्ये गेल्या आठवड्यात 5.20 रुपयांची घसरण झाली. शेअर 531.10 रुपयांवरून 475.90 रुपये प्रति युनिटवर आला आहे. राकेश झुनझुनवाला यांच्याकडेही स्टार हेल्थचे 10,07,53,935 शेअर्स आहेत. गेल्या आठवड्यात प्रति शेअर 55.20 रुपयांनी घसरला. परिणामी, राकेश झुनझुनवाला यांचे अंदाजे 555 कोटी रुपयांचा तोटा झाला. स्टार हेल्थ आणि टायटनच्या समभागांच्या किमतीत झालेल्या घसरणीमुळे राकेश झुनझुनवाला यांच्या संपत्तीत रु. 1,040 कोटींची घट झाली आहे. याशिवाय टाटा मोटर्स, इंडियन हॉटेल्स कंपनी, रॅलिस इंडिया, नाल्को, कॅनरा बँक आदींच्या शेअर्समध्येही गेल्या आठवड्यात घसरण पाहायला मिळाली. राकेश झुनझुनवाला यांच्या पोर्टफोलिओमध्येही हे शेअर्स समाविष्ट आहेत.