महबूबा मुफ्ती पुढीला आदेशापर्यंत नजरकैदेत, भावाला ED ने पाठवला समन्स

नवी दिल्ली : अंमलबजावणी संचालनालयाने (ED) जम्मू आणि काश्मीरच्या माजी मुख्यमंत्री मेहबूबा मुफ्ती (Mehbooba Mufti) यांचे भाऊ तस्दुक हुसैन मुफ्ती यांना मनी लॉन्ड्रिंग प्रकरणात चौकशीसाठी समन्स बजावले आहे. मुफ्ती मंत्रिमंडळात पर्यटन मंत्री असलेले तस्दुक हुसेन यांना गुरुवारी त्यांचे म्हणणे नोंदवण्यास सांगण्यात आले आहे. दुसरीकडे, माजी मुख्यमंत्री मेहबुबा मुफ्ती यांना आंदोलनात सहभागी झाल्यानंतर नजरकैदेत ठेवण्यात आले आहे.

तस्दुक हुसेन यांना ईडीने तपास अधिकाऱ्यासमोर हजर राहून मनी लाँडरिंग प्रतिबंधक कायद्याच्या (पीएमएलए) तरतुदींनुसार जबाब नोंदवण्यास सांगितले आहे. तपास काश्मीरमधील काही व्यवसायांकडून त्यांच्या खात्यांमध्ये कथितरित्या मिळालेल्या काही पैशांशी संबंधित आहे.

यावर प्रतिक्रिया देताना मेहबुबा मुफ्ती म्हणाल्या की, हे त्यांच्याविरोधात राजकीय सूडबुद्धीचे षडयंत्र आहे. 'जेव्हा मी कोणत्याही चुकीच्या विरोधात आवाज उठवते तेव्हा माझ्या कुटुंबातील कोणत्या ना कोणत्या सदस्यासाठी समन्सची वाट पाहत असते, यावेळी माझ्या भावाची पाळी आहे.'

आणखी एका मनी लाँड्रिंग प्रकरणात ईडीकडून चौकशीला सामोरे जाणाऱ्या मेहबूबा मुफ्ती म्हणाल्या की, सोमवारी श्रीनगर शहराच्या बाहेरील निष्पाप नागरिकांच्या हत्येचा निषेध करत आहे. सोमवारी शहराच्या बाहेरील भागात लष्कर आणि पोलिसांनी केलेल्या गोळीबारात चार जण ठार झाले.

मारले गेलेल्यांचे वर्णन दहशतवादी आणि दहशतवाद्यांना आश्रय देणारे असे करण्यात आल्याचा आरोप त्यांनी केला. मात्र, या लोकांच्या कुटुंबीयांनी ते निर्दोष असल्याचे सांगत दाव्याला विरोध केला आहे. या प्रकरणातील पोलिसांच्या परस्परविरोधी विधानांमुळे मेहबुबा मुफ्ती यांच्यासह राजकीय नेत्यांनीही याला विरोध करण्यास संधी मिळाली आहे.

मेहबुबा मुफ्ती नजरकैदेत
याच मुद्द्यावर बुधवारी मेहबुबा रस्त्यावर उतरल्या होत्या मात्र त्यांना नजरकैदेत ठेवण्यात आले आहे. जम्मूहून परतल्यानंतर पक्षप्रमुखांना नजरकैदेत ठेवण्यात आल्याचे पीडीपीचे म्हणणे आहे. मेहबुबा यांना लाल चौकात जायचे होते, जिथे त्यांना दोन सामान्यांच्या हत्येचा निषेध करण्यासाठी कुटुंबासह धरणे धरायचे होते. मात्र, याप्रकरणी अद्याप पोलिसांकडून कोणतीही प्रतिक्रिया आलेली नाही.