Air Pollution : वायू प्रदूषणामुळे मुलांमध्ये वाढतोय व्हायरसचा धोका, असा करा बचाव

दरवर्षी ऑक्‍टोबर-नोव्‍हेंबर महिन्‍यात वायू प्रदूषणाची पातळी लक्षणीयरीत्या वाढते. मात्र यंदा दिवाळीपूर्वीच दिल्ली-एनसीआर आणि परिसरातील हवेची गुणवत्ता अत्यंत खराब झाली आहे. आजूबाजूला विषारी हवा आणि धुक्यामुळे लोकांना घराबाहेर पडणे कठीण झाले आहे. सततच्या वाढत्या प्रदूषणामुळे लोकांना आरोग्यासंबंधी अनेक समस्यांना सामोरे जावे लागत आहे. विशेषत: प्रदूषित हवेमुळे वृद्ध आणि लहान मुलांचे जास्त नुकसान होते. हवेत आढळणारे हानिकारक कण आणि विषारी वायूंचा मुलांच्या आरोग्यावर खूप वाईट परिणाम होतो. प्रदूषित हवेच्या सतत श्वासोच्छवासामुळे मुलांची प्रतिकारशक्ती कमकुवत होते, त्यामुळे ते अनेक आजारांना बळी पडतात. अशा परिस्थितीत मुलांमध्ये सर्दी, दमा, न्यूमोनिया, ब्राँकायटिस आणि हृदयाशी संबंधित आजारांचा धोका मोठ्या प्रमाणात वाढतो.

मुलांमध्ये वायू प्रदूषणामुळे होणारे आजार

श्वसन समस्या
हवेतील PM 2.5, PM 10 आणि नायट्रोजन डायऑक्साइडचा श्वसनसंस्थेवर खूप वाईट परिणाम होतो. त्यामुळे लहान मुलांमध्ये दमा, ब्राँकायटिस, फुफ्फुसाचा संसर्ग आणि श्वासोच्छवासाच्या समस्यांचा धोका मोठ्या प्रमाणात वाढतो.

कमकुवत फुफ्फुसे
प्रदूषित हवेत श्वास घेतल्याने मुलांच्या फुफ्फुसांचा योग्य विकास होत नाही. प्रदूषणामुळे फुफ्फुसे कमकुवत होतात आणि फुफ्फुसात जळजळ होऊ शकते.

विकासात्मक विलंब
प्रदूषणाचा थेट परिणाम मुलांच्या विकासावरही होतो. हवेतील नायट्रोजन आणि सल्फरसारखे विषारी वायू मुलांच्या मेंदूपर्यंत पोहोचून त्यांचा मानसिक आणि बौद्धिक विकास मंदावतो. याशिवाय मुलांच्या शारीरिक विकासावरही याचा परिणाम होतो.

हृदयाशी संबंधित समस्या
प्रदूषित वातावरणात राहिल्यामुळे मुलांमध्ये हृदयाशी संबंधित समस्यांचा धोका वाढू शकतो. यामुळे मुलांना उच्च रक्तदाब आणि हृदयाशी संबंधित इतर समस्या होऊ शकतात.

मुलांना प्रदूषणापासून वाचवण्याचे मार्ग

• मुलांना बाहेर पाठवताना त्यांनी फेस मास्क लावावा.
• प्रदूषणाच्या दुष्परिणामांपासून त्यांचे संरक्षण करण्यासाठी मुलांना दररोज वाफ द्यावी.
• घरातील हवा स्वच्छ ठेवण्यासाठी एअर प्युरिफायर किंवा योग्य वेंटिलेशनची मदत घ्या.
• उच्च वायू प्रदूषणाच्या काळात मुलांना घराबाहेर काढू नका.
• मुलांना नियमितपणे योगा करायला लावा, जेणेकरून त्यांची फुफ्फुसे मजबूत आणि निरोगी राहतील.