PM Narendra Modi biopic : निवडणूक निकालाच्या दुसऱ्याच दिवशी 'पीएम नरेंद्र मोदी' प्रेक्षकांच्या भेटीला
एक्झिट पोलविषयीसुद्धा विवेकने त्याची प्रतिक्रिया दिली.
)
मुंबई : लोकसभा निवडणूक आणि निवडणूक आयोगाची नियमावली पाहता पंतप्रधान नरेंद्र मोदी यांच्या जीवनप्रवासावर बेतलेल्या 'पीएम नरेंद्र मोदी' चित्रपटाच्या वाटेत गेल्या काही दिवसांपासून बऱ्याच अडचणी येत आहेत. अशा परिस्थितीतच आता एका पत्रकार परिषदेत खुद्द अभिनेता विवेक ओबेरॉय याने चित्रपट २४ मे या तारखेला प्रदर्शित होणार असून आपण, चित्रपटाच्या यशाविषयी विश्वास व्यक्त केला. नागपूर येथे चित्रपटाच्या पोस्टरच्या अनावरण सोहळ्यानंतर माध्यमांशी संवाद साधताना त्याने आपली भूमिका मांडली.
रविवारीच जाहीर झालेल्या लोकसभा निवडणुकांच्या एक्झिट पोलविषयीसुद्धा विवेकने त्याची प्रतिक्रिया दिली. देशभरातील जनतेचं नरेंद्र मोदी यांच्यावर असणारं प्रेम पाहता एक्झिट पोलमध्ये आलेली आकडेवारी ही आनंददायी आणि समाधानकारक असल्याचं तो म्हणाला. एक्झिट पोल जाहीर होण्यापूर्वी मोदींविषयी बऱ्याच चर्चा होत्या, आपण परिस्थितीला घाबरून गेलो नाही, असं म्हणत विवेकने चित्रपट मे महिन्याच्या २४ तारखेला प्रदर्शित होणार असल्याचं जाहीर केलं. गेल्या साठ वर्षांपासून देशाच्या प्रगतीच्या वाटेत जे काही खड्डे खणले गेले ते खड्डे बुझवून आता त्यावर विकासाची इमारत बांधली जाणार असल्याचं म्हणत विवेकने मोदी सरकारच्या कार्यपद्धतीचं समर्थन केलं.
Nagpur, Maharashtra: Union Minister Nitin Gadkari and actor Vivek Oberoi launch poster of biopic 'PM Narendra Modi' pic.twitter.com/bUuwSBGLsQ
— ANI (@ANI) May 20, 2019
पत्रकार परिषदेत माध्यमांच्या प्रश्नांची उत्तरं देत त्याने चित्रीकरणादरम्यान आलेल्या मोदींच्या लोकप्रियतेचाही किस्सा सांगितला. गांधीनगर येथे चित्रीकरण सुरू असतेवेळी जेव्हा मोदींच्याय रुपात आपण चाहत्यांसमोर आलो, तेव्हा खरेखुरे मोदी समोर आल्याप्रमाणेच उपस्थित चाहत्यांमघ्ये आनंद आणि उत्साहाची लाट पाहायला मिळाली. तर, काहींनी मोदींच्याच नावाच्या घोषणा देण्यात सुरुवात केली होती, ही आठवम विवेकने सांगितली. यावेळी चित्रपटाच्या प्रदर्शनापूर्वी तो बराच आशावादी असल्याचंही पाहायला मिळालं. 'पीएम नरेंद्र मोदी' या चित्रपटात विवेक ओबेरॉय पंतप्रधान नरेंद्र मोदींची भूमिका साकारत आहे. त्याची ही मध्यवर्ती भूमिका आणि चित्रपटाचा ट्रेलर गेल्या बऱ्याच दिवसांपासून चर्चेचा विषय ठरत होता. पण, निवडणुकांचा एकंदर माहोल पाहता विरोधी पक्ष नेत्यांकडून आचारसंहितेदरम्यान या चित्रपटाच्या प्रदर्शनाला तीव्र विरोध करण्यात आला होता. अखेर आता हा चित्रपट प्रेक्षकांच्या भेटीला येण्यासाठी सज्ज आहे.