प्रिया बापटच्या 'गच्ची' सिनेमाचा अफलातून ट्रेलर

मुंबई : प्रत्येकाच्या आयुष्याची ही अशी जागा ज्याचं महत्व प्रत्येकाच्या जीवनात वेगळं आहे आणि ती जागा म्हणजे "गच्ची"

गच्ची कुणासाठी प्रेम फुलवणारी जागा तर कुणासाठी त्यांच्या एकांतातील सोबती असं सगळं असताना गच्चीवर प्रत्येकाच भरभरून प्रेम. गच्ची मग ती बिल्डिंगची असो वा साध्या चाळीतल्या घराची. पण गच्चीचं एक अनन्य साधारण महत्व प्रत्येकाच्या आयुष्यात आहे. आणि हेच महत्व अधोरेखित करणारा 'गच्ची' हा सिनेमा २२ डिसेंबरला प्रेक्षकांच्या भेटीला येणार आहे. नुकताच या सिनेमाचा ट्रेलर रिलिज झाला आहे. 

"गच्ची" कुणाचा सिनेमा?

प्रिया बापट आणि अभय महाजन यांच्या मुख्य भूमिका असणाऱ्या या चित्रपटाचा ट्रेलर पाहताना ‘गच्ची’ किती महत्त्वाची असते याची अनुभूती नकळत होते. प्रिया आणि अभयच्या अफलातून अभिनयामुळे या चित्रपटाविषयीची उत्सुकता आणखीनच शिगेला पोहोचली आहे. नचिकेत सामंत दिग्दर्शित या ‘गच्ची’वर २२ डिसेंबरपासून प्रेक्षकांना फेरफटका मारता येणार आहे. धकाधकीच्या आयुष्यात येणाऱ्या अडचणी आणि त्या लहानसहान पण तितक्याच गोंधळवणाऱ्या अडचणींना तोंड देताना होणारी घुसमट या चित्रपटातून दिग्दर्शकाने टिपण्याचा प्रयत्न केल्याचे पाहायला मिळते.

या सिनेमाकडे साऱ्यांच लक्ष लागून राहिलं आहे. गच्ची पाहण्यासाठी प्रेक्षक उत्सुक आहेत.