प्रेग्नेंसीमध्ये योनीमार्गात का होतेय जळजळ?

मुंबई : गर्भधारणेच्या वेळी महिलांच्या शरीरात अनेक मोठे बदल होत असतात. यामध्ये महिलांना जाणवणारा एक बदल म्हणजे गर्भधारणेदरम्यान योनीमार्गात खाज सुटणं आणि जळजळ होणं. यामागचे कारण म्हणजे योनीतून द्रवपदार्थाचा जास्त प्रमाणात होणारा डिस्चार्ज. 

योनीमार्गातून होणाऱ्या डिस्चार्जचं प्रमाण ज्यावेळी वाढतं तेव्हा पीएच पातळी देखील वाढू शकते. परिणामी यामुळे इन्फेक्शन होण्याची समस्या उद्भवू शकते. मात्र, यामागे इतरही अनेक कारणं असू शकतात. आणि प्रत्येक महिलेला ही कारणं माहिती असणं खूप गरजेचं आहे.

योनीमार्गात खाज आणि जळजळ होण्याची कारणं

• महिलांना योनीमार्गात खाज येणं हे यूटीआय म्हणजेच युरिनरी इन्फेक्शमुळे होऊ शकतं. ई. कोली बॅक्टेरियामुळे हे इन्फेक्शन होतं. ज्यामुळे महिलांना तीव्र खाज आणि जळजळ होण्याचा त्रास होतो.
• ज्यावेळी महिला योनीमार्गात काही केमिकलयुक्त पदार्थांचा वापर करतात तेव्हा खाज आणि जळजळ होण्याचा त्रास होतो.
• जर महिलांना गर्भधारणेत यीस्ट इन्फेक्शनचा त्रास झाला तर योनीमार्गामध्ये खाज सुटणं आणि जळजळ होण्याची समस्या समोर येण्याची शक्यता वाढते. ज्यावेळी एखाद्या महिलेची इम्युनिटी कमी होते तेव्हा हा त्रास होतो.
• गर्भधारणेदरम्यान टिश्यू कोरडे होणं हे नैसर्गिक आहे. अशा स्थितीत योनीमार्गामध्ये कोरडेपणा, खाज आणि जळजळ या तक्रारी उद्भवू शकतात.
• गर्भधारणेदरम्यान महिलांना अधिक प्रमाणात घाम येते. योनीमार्गाच्या जवळच्या भागांमध्ये हा घाम आल्यास ही समस्या समोर येऊ शकते.