अटलबिहारी यांच्या सारखा पंतप्रधान होणे शक्य नाही - आडवाणी

अहमदाबाद :  महाराष्ट्रातील शिवसेना-भाजप युती तुटल्याने भाजपचे ज्येष्ठ नेते लालकृष्ण आडवाणी यांनी थेट नाराजी व्यक्त केली. यावेळी पंतप्रधान नरेंद्र मोदी यांना आडवाणी यांनी चिमटा काढला. अटबिहारी यांच्या सारखा पंतप्रधान होणे शक्य नाही, असे ते म्हणालेत.

स्वच्छता अभियानानिमित्त भाजपचे ज्येष्ठ नेते लालकृष्ण आडवाणी गुरुवारी अहमदाबाद येथे आले होते. या अभियानानंतर पत्रकारांशी बोलताना आडवाणींनी भाजप नेत्यांचे कान उपटले.

'एनडीएतील मित्रपक्ष राज्यामध्ये शक्तीशाली असल्याने राज्यात ते सत्तास्थापन करु शकतात तर केंद्रात सत्तास्थापनेची जबाबदारी भाजपची आहे. त्यामुळे भाजप नेत्यांनी आपली जबाबदारी ओळखूनच काम करावे, अशा शब्दात आडवाणी यांनी राज्यातील भाजप नेत्यांना सुनावले.

पंतप्रधान नरेंद्र मोदीं हे चांगले असले तरी अटलबिहारी वाजपेयींसारखा पंतप्रधान पुन्हा होणे अशक्यच आहे असा चिमटाही त्यांनी मोदींना काढला. राज्यात २५ वर्षे जुनी युती तुटल्यावर भाजपचे ज्येष्ठ नेते लालकृष्ण आडवाणी नाखुश आहेत.

महाराष्ट्रात युती तुटली नसती तर मला आनंदच झाला असता. आमच्या पक्षातील अनेक नेते जागावाटपावरुन नाराज होते. भाजपला जास्त जागा द्यायला पाहिजे, अशी त्यांची भूमिका होती. याविषयी मला जास्त काही माहिती नाही. मात्र एनडीएतील मित्रपक्ष हे राज्यपातळीवरील पक्ष असल्याने राज्यात तेच शक्तीशाली आहेत असे आडवाणींनी म्हटले आहे. 

शिवसेना पक्षप्रमुख उद्धव ठाकरे यांनीही युतीतील तणावात हस्तक्षेप करण्याची मागणी आडवाणींकडे केली होती. मात्र आडवाणी यांना आता पक्षातील निर्णयप्रक्रियेपासून दूर ठेवण्यात आल्याने आडवाणी हस्तक्षेप करु शकले नाहीत, अशी माहिती सूत्रांकडून देण्यात आली.

* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.

*  झी २४ तासला ट्विटरवर फोलो करा.