आतातरी सावध व्हा! कोरोनामुळे मुंबईतील १४६ ठिकाणं सील

मुंबई: गेल्या काही दिवसांमध्ये मुंबईत कोरोनाच्या रुग्णांचा आकडा झपाट्याने वाढताना दिसत आहे. सुरुवातील केवळ परदेशी नागरिक आणि त्यांच्या नातेवाईकांना कोरोनाचा संसर्ग होताना दिसत होता. मात्र, गेल्या काही दिवसांमध्ये परदेशी प्रवासाची कोणतीही पार्श्वभूमी नसलेल्या लोकांमध्येही कोरोनाची लक्षणे आढळून आली आहेत. सगळ्यात महत्त्वाचे म्हणजे यापैकी अनेक संशयित झोपडपट्टीच्या दाट लोकवस्तीत राहणारे आहेत. यामध्ये वरळी- कोळीवाडा आणि दहिसरचा समावेश आहे. त्यामुळे मुंबईत मोठ्याप्रमाणाव कोरोनाचा संसर्ग होऊ शकतो. या पार्श्वभूमीवर मुंबई महानगरपालिकेने खबरदारीचा उपाय म्हणून शहरातील १४६ परिसर सील केले आहेत. हे परिसर बॅरिकेटिंग करून बंद करण्यात आले आहेत. तसेच या भाागातील नागरिकांना जीवनावश्यक वस्तू घरपोच केल्या जात आहेत.