मराठी मुलांनी संधीचा फायदा घ्या; आर्थिक संकटात रोहित पवारांचा सल्ला

मुंबई : Coronavirus साऱ्या जगाला संकटात टाकून अगदी वेगाने फोफावत असतानाच आता त्याचे थेट परिणाम हे जागतिक अर्थव्यवस्थेवर दिसून येऊ लागले आहेत. एकिकडे कोरोनावर मात कशी करायची हा प्रश्न असतानाच भारतासह अनेक राष्ट्रांपुढे आव्हान आहे ते म्हणजे मंदावलेल्या आर्थिक चक्राला पुन्हा गती देण्याचं. 

राज्याचं चित्रही सध्या काही वेगळं नाही. याच परिस्थितीचा आढावा घेत आता अनेक राजकीय नेतेमंडळींनी सरकारला सल्ले देत या वित्तीय संकटातून कशा प्रकारे तरुन जाता येईल यासाठी जणू मार्गच दाखवण्यास सुरुवात केली आहे. यातच आता महाराष्ट्रातील एका युवा नेत्याची भर पडली आहे. हे नाव म्हणजे राष्ट्रवादीचे आमदार रोहित पवार यांचं. 

सोशल मीडियावर सातत्याने काही महत्त्वाच्या मुद्द्यांवर व्यक्त होणाऱ्या रोहित पवार यांनी केंद्राला आणि राज्याला अनुसरून काही ट्विट केले आहेत. ज्यामध्ये त्यांनी नोकरभरती रद्द करण्यापेक्षा सरकारने एका वर्षासाठी मोफत सेवा किंवा किमान वेतन तत्त्वाचा मार्ग अवलंबण्याचा सल्ला दिला. असं केल्यास युवांना नोकरी, सरकारला मनुष्यबळ मिळेल असा विश्वासही व्यक्त केला. 

कोरोनामुळे आलेल्या वित्तिय संकटामुळे सरकारने
यंदा नोकरभरती रद्द केली,पण वयाच्या अटीमुळे अनेक युवा age bar होतील. त्यामुळे सरकारने भरती रद्द न करता एक वर्षासाठी मोफत सेवा/किमान वेतन द्यावे. यामुळे युवांना नोकरी व सरकारला मनुष्यबळ मिळेल & याला युवा सहकार्य करतील, असा विश्वास वाटतो.

— Rohit Pawar (@RRPSpeaks) May 6, 2020

लॉक डाऊन शिथिल होत असतानाच अनेक कामगार/मजूर स्वगृही जात आहेत. परराज्यातील या कामगारांअभावी उद्योग-व्यवसाय सुरू करण्यात अडचण येऊ शकते. पण हे कामगार परत गेल्याने निर्माण झालेल्या संधीचा फायदा मराठी मुलांनी उठवावा व आजच्या संकटात कोणतंही काम कमी दर्जाचं समजू नये.

— Rohit Pawar (@RRPSpeaks) May 6, 2020

CCI कडून होणारी कापूस खरेदी बंद होणार नाही तर गर्दीमुळे कोरोनाचा प्रादुर्भाव होऊ नये यासाठी बाजार समित्यांकडून काही उपाययोजना केल्या जातायेत.यामुळे शेतकऱ्यांनी घाबरुन जाऊ नये. याबाबत वरिष्ठ अधिकाऱ्यांशी चर्चा केली असता शेतकऱ्यांचा सर्व कापूस खरेदी करणार असल्याचं त्यांनी सांगितलं.

— Rohit Pawar (@RRPSpeaks) May 6, 2020

आंतरराष्ट्रीय बाजारात घसरलेल्या तेलाच्या मूलभूत किमतींतील फरकाचा लाभ केंद्र सरकारने लोकांना द्यावा. तर राज्यांनीही आपलं उत्पन्न वाढेल एवढा टॅक्स ठेवून पेट्रोल-डिझेलचे दर कमी करावेत & लोकांनाही दिलासा द्यावा. शिवाय दिल्लीप्रमाणे मद्यावरही अधिक टॅक्स आकारण्याबाबत विचार व्हावा.

— Rohit Pawar (@RRPSpeaks) May 6, 2020

लॉकडाऊनचा कालावधी हळूहळू शिथिल होण्याच्या वाटेवर असतानाच अनेक स्थलांतरित मजुर हे त्यांच्या राज्यात परतत आहेत. त्यामुळे सहाजिकच याचा बोजा उद्योग आणि व्यवसायांवर येणारय पण, या परिस्थितीकडे मराठी मुलांनी संधी म्हणून पाहत त्याचा फायदा घ्यावा असा पर्याय त्यांनी सुचवला. 

कोणतंही काम कमी दर्जाचं समजू नका, असा सल्ला देत त्यांनी या ट्विटच्या शृंखलेतून कापूस खरेदीच्या मुद्द्यावरही प्रकाशझोत टाकला. शिवाय आंतरराष्ट्रीय बाजारपेठेत कच्च्या तेलाच्या किंमतींविषयी त्यांनी केंद्रालाही सल्ला दिला. तर, दिल्लीप्रमाणेच दारुवर कराचं प्रमाण वाढवण्याचीही विचारणा केली. एकंदरच चौफेर विचार करत या युवा नेत्याने दिलेले हे सल्ले पाहता पुन्हा एकदा कोरोनाच्या या संकटात अर्थव्यवस्थेबाबतही सर्वजण सजग असल्याचंच स्पष्ट होत आहे.