खासदार प्रतापराव पाटील चिखलीकर यांना कोरोना विषाणूची बाधा

 नांदेड : येथील खासदार प्रतापराव पाटील चिखलीकर यांना कोविड-१९ची लागण झाली आहे. मुलापाठोपाठ चिखलीकरांची कोरोना चाचणीही पॉझिटिव्ह आली. त्यांच्यावर औरंगाबाद इथे एका खासगी रुग्णालयात प्रतापराव पाटील चिखलीकर यांच्यावर उपचार सुरु आहेत. आपली प्रकृती ठणठणीत असून, कोणीही चिंता करु नये, असे खासदार चिखलीकर यांनी म्हटले आहे.

नांदेड जिल्हा परिषद सदस्य प्रवीण पाटील चिखलीकर यांना कोरोनाचा संसर्ग झाल्याचे समोर आले होते. त्यानंतर त्यांचे वडील आणि  प्रताप पाटील चिखलीकर यांचीही कोरोना टेस्ट पॉझिटिव्ह आली. पिता-पुत्रावर औरंगाबादमध्ये उपचार सुरु आहेत.

  दरम्यान, खासदार चिखलीकर यांचे चिरंजीव प्रवीण चिखलीकर यांच्यावरही औरंगाबाद इथे कोरोना विषाणू संसर्गावर उपचार सुरू होते, ते या संसर्गातून मुक्त झाले आहेत. त्यांना आज रुग्णालयातून घरी पाठविण्यात येणार आहे. 

मार्च महिन्यापासूनच चिखलीकर पिता-पुत्र दोघेही  मतदारांच्या संपर्कात आले होते. त्यातून त्यांना कोरोनाची लागण झाल्याचे सांगण्यात येत आहे. सध्या या दोघांची प्रकृती स्थिर असल्याचे कुटुंबियांकडून सांगण्यात आले. चिखलीकर यांच्या संपर्कात आलेल्या अन्य सात जणांची चाचणीही पॉझिटिव्ह आली आहे.  त्यांच्यावरही उपचार सुरु आहेत.  याआधी काँग्रेसच्या चार आमदारांना कोरोनाची लागण झाली होती.