Russia Ukraine War : युक्रेनमध्ये 20 हजार भारतीय अडकले, भारत सरकारने घेतला 'हा' मोठा निर्णय

Russia Ukraine War : रशियन हल्ल्यानंतर सरकारने युक्रेनमध्ये अडकलेल्या भारतीय विद्यार्थ्यांना आणि इतर नागरिकांना परत आणण्याची योजना आखली आहे. यासाठी सरकार विशेष विमानं पाठवणार असून, त्याचा खर्च भारत सरकार स्वतः उचलणार आहे.

युक्रेनमध्ये 20 हजार विद्यार्थी
भारतातील सुमारे 20 हजार नागरिक युक्रेनमध्ये अडकले आहेत (Indian Students Trapped in Ukraine). यापैकी १८ हजार विद्यार्थी वैद्यकीय शिक्षण घेण्यासाठी गेले आहेत. रशिया-युक्रेनमध्ये लष्करी तणाव सुरू झाल्यानंतर हे विद्यार्थी भीतीच्या छायेखाली जगत आहेत. सोशल मीडियावर वारंवार व्हिडिओ शेअर करून ते सरकारला तेथून मायदेशी नेण्याची विनंती करत आहेत.

रशियाच्या हल्ल्यानंतर युक्रेनमध्ये परिस्थिती बिघडली
रशियन हल्ल्यानंतर युक्रेनमधील (इंडियन स्टुडंट्स ट्रॅप्ड इन युक्रेन) परिस्थिती झपाट्याने बिघडत आहे. खाद्यपदार्थांचा तुटवडा सुरू झाला आहे. एटीएममधील रोकड संपल्याने नागरिकांमध्ये चेंगराचेंगरीच्या घटना घडत आहेत. युक्रेनची राजधानी कीववर रशियन क्षेपणास्त्रे आणि बॉम्ब पडल्याने विद्यार्थ्यांमध्ये भीती वाढली आहे. 

विद्यार्थ्यांसोबतच भारतातल्या राजकारण्यांनीही मोदी सरकारला या प्रकरणी पुढाकार घेण्याची विनंती केली आहे. काँग्रेस नेते राहुल गांधी आणि तामिळनाडूचे मुख्यमंत्री एमके स्टॅलिन यांनी मोदी सरकारला युक्रेनमध्ये अडकलेल्या भारतीय नागरिकांच्या मायदेशी परतण्यासाठी व्यवस्था करण्याची विनंती केली आहे. पंतप्रधान नरेंद्र मोदी यांनी गुरुवारी संध्याकाळी मंत्रिमंडळाच्या सुरक्षा समितीची बैठक घेऊन परिस्थितीचा आढावा घेतला. त्यानंतर युक्रेनमध्ये अडकलेल्या भारतीय नागरिकांच्या मायदेशी आणण्यासाठी विशेष मोहीम राबवण्याची घोषणा करण्यात आली.

सरकारने तयार केली योजना
या विद्यार्थ्यांना आणि नागरिकांना आधी रस्तेमार्गे शेजारील पोलंड आणि हंगेरी इथं आणलं जाईल आणि तिथून त्यांना विमानाने मायदेशी आणलं  जाईल, अशी योजना तयार करण्यात आली आहे. यासाठी सरकारने युक्रेन, हंगेरी, पोलंडसह सर्व संबंधित सरकारांकडून सहकार्य मागितलं आहे. लवकरच ही मोहीम सुरू होणार असल्याचे सूत्रांचं म्हणणं आहे.