गांधी-नेहरु परिवारातील राहुल कितवे काँग्रेस अध्यक्ष?

नवी दिल्ली : राहुल गांधी यांची काँग्रेस अध्यक्षपदी अधिकृत घोषमा झाली आहे. १६ डिसेंबरला राहुल गांधी सोनिया गांधींकडून अध्यक्षपदाची सूत्र हातामध्ये घेतील. राहुल गांधी हे काँग्रेसचे गांधी-नेहरु परिवारातील सहावे अध्यक्ष आहेत. राहुल गांधींच्या आधी मोतीलाल नेहरु, जवाहरलाल नेहरु, इंदिरा गांधी, राजीव गांधी, सोनिया गांधी यांनी काँग्रेसचं अध्यक्षपद भुषवलं आहे.

मोतीलाल नेहरु

सगळ्यात पहिले गांधी-नेहरु परिवारातील मोतीलाल नेहरु 1928 मध्ये काँग्रेसचे अध्यक्ष झाले.

जवाहरलाल नेहरु

त्यानंतर लगेचच म्हणजे पुढच्या वर्षी 1929-30 मध्ये जवाहरलाल नेहरु काँग्रेस अध्यक्ष झाले. मग 1936-37 आणि 1951 ते 1954 पर्यंत नेहरु पुन्हा काँग्रेस अध्यक्ष राहिले.

इंदिरा गांधी

1959 मध्ये इंदिरा गांधी पहिल्यांदाच काँग्रेसच्या अध्यक्षा झाल्या. त्यानंतर 1978 ते 1984पर्यंत इंदिरा गांधीच काँग्रेसच्या अध्यक्षा राहिल्या.

राजीव गांधी

इंदिरा गांधी यांच्या निधनानंतर त्यांचा मुलगा राजीव गांधी यांच्याकडे काँग्रेस अध्यक्षपदाची धुरा आली. 1985-1991 या काळामध्ये राजीव गांधी काँग्रेसचे अध्यक्ष होते.

सोनिया गांधी

राजीव गांधी यांची पत्नी सोनिया गांधी यांच्याकडे 1998मध्ये काँग्रेस अध्यक्षपदाची जबाबदारी आली. 1998 ते 2017 अशी 17 वर्ष सोनिया गांधी काँग्रेसच्या अध्यक्षा आहेत.