ఒకప్పటి బాలీవుడ్ స్టార్ హీరో మిథున్ చక్రవర్తి కుమారుడు మహాక్షయ్ పై అత్యాచార ఆరోపణలతో కేసు నమోదు చేశారు. అలాగే మిథున్ చక్రవర్తి సతీమణి యోగితా బాలిపై కూడా మోసపూరితంగా వ్యవహరించినందుకు కేసు నమోదు చేశారు. ఈ క్రమంలో ఈ కేసుకు సంబంధించిన తదుపరి దర్యాప్తు చేయమని రోహిణి కోర్టు బెగంపూర్ పోలీసులను ఆదేశించింది.
వివరాల్లోకి వెళితే, ఓ యువతి మహాక్షయ్ పై ఫిర్యాదు చేస్తూ.. 2015 సంవత్సరం నుండి ఆయనతో తనకు శారీరక సంబంధాలు ఉన్నాయని తెలిపింది. తనను పెళ్లి చేసుకుంటానని చెప్పి మిథున్ కుమారుడు మోసం చేశాడని.. ఈ విషయం అతని తల్లికి తెలుసని చెబుతూ ఆమె ఫిర్యాదులో పేర్కొంది. తాను కూడా పలు హిందీ, భోజ్‌పూరి చిత్రాల్లో నటించినట్లు ఆ యువతి తెలిపింది. ప్రస్తుతం మిథున్ చక్రవర్తి కుటుంబీకులు తనను మానసికంగా వేధిస్తున్నారని సదరు యువతి పేర్కొంది.
మిథున్ చక్రవర్తి కుమారుడు మహాక్షయ్ 2008లో "జిమ్మి" చిత్రంతో తెరంగేట్రం చేశారు. ఆ తర్వాత ఆయన పెద్దగా సినిమాల్లో కనిపించలేదు. "మిమో" అనే నిక్ నేమ్‌తో ఆయన సుపరిచితుడు. హాంటెడ్, లూట్, ఎనిమీ మొదలైన సినిమాల్లో కూడా మహాక్షయ్ నటించారు. 2015లో రిలీజైన "ఇష్క్ దరియా" మహాక్షయ్ నటించిన ఆఖరి చిత్రం.
