त्या रात्रीची कहाणी : कुस्तीपटू सुशील कुमार याने सागरला अशी केली मारहाण, पोलीस चौकशीत ही गोष्ट आली समोर

मुंबई : काही महिन्यांपूर्वी कुस्तीपटू सुशील कुमार (Wrestler sushil kumar) आणि त्याच्या सहकाऱ्यांनी छत्रसाल स्टेडियमचा दरवाजा आतून बंद केला. त्यानंतर 30 ते 40 मिनिटे बॅटन, हॉकी आणि बेसबॉल बॅटसह माजी कनिष्ठ राष्ट्रीय कुस्ती विजेता सागर धनखार आणि इतरांना मारहाण केली. खुनाच्या प्रकरणात दिल्ली पोलिसांनी दाखल केलेल्या आरोपपत्रात ही माहिती देण्यात आली आहे. सागर धनखार आणि त्याच्या चार मित्रांना मालमत्तेच्या वादातून 4 मे रोजी रात्री कुमार आणि इतरांनी स्टेडियममध्ये मारहाण केली. त्यानंतर सागरचा मृत्यू झाला.

पोलीस तपासात उघड झाले की, सागर आणि त्याच्या मित्रांचे दिल्लीतील दोन वेगवेगळ्या ठिकाणांहून अपहरण करून त्यांना स्टेडियममध्ये आणण्यात आले, त्यानंतर गेटला आतून कुलूप लावण्यात आले आणि सुरक्षा रक्षकांना बाहेर जाण्यास सांगण्यात आले. जवळजवळ एक हजार पानांच्या आपल्या अंतिम अहवालात पोलिसांनी म्हटले आहे की, स्टेडियममधील सर्व पीडितांना घेरण्यात आले होते आणि त्यांना सर्व आरोपींनी बेदम मारहाण केली होती. सर्व पीडितांना सुमारे 30 ते 40 मिनिटे लाठ्या, काठ्या, हॉकी, बेसबॉल बॅट इत्यादींनी मारहाण करण्यात आली.

आरोपपत्रात, या प्रकरणाची चौकशी करणार्‍या गुन्हे शाखेने असेही उघड केले की काही आरोपींनी तेथे बंदुका आणल्या होत्या आणि पीडितांना गंभीर परिणामांची धमकी दिली होती. दरम्यान, एक पीडित घटनास्थळावरून पळून जाण्यात यशस्वी झाला आणि त्याने पोलिसांना फोन केला त्यानंतर स्थानिक पोलीस आणि पीसीआर व्हॅनचे कर्मचारी स्टेडियममध्ये पोहोचले.

आरोपपत्रानुसार, तपासात उघड झाले की आरोपींनी पोलीस सायरन ऐकताच ते सागर आणि जखमी सोनूला स्टेडियमच्या आतील बाजूस घेऊन गेले. आरोपींनी दोन्ही पीडितांना जखमी अवस्थेत तिथेच सोडून घटनास्थळावरून पळ काढला.

आरोपपत्रानुसार, शवविच्छेदन (Postmortem) अहवालानुसार, सागर धनखार याच्या मृत्यूचे कारण जड वस्तू डोक्यात घातल्याने मेंदूला मोठी दुखापत झाली. आरोपी सुशील कुमार आणि त्याच्या साथीदारांच्या ताब्यातून पाच वाहने जप्त करण्यात आली. वाहनाच्या मागच्या सीटवरून एक डबल बॅरल गन आणि पाच जिवंत काडतुसेही जप्त करण्यात आली.

पोलिसांनी सोमवारी सुशील कुमार आणि इतर 12 जणांविरुद्ध खून प्रकरणात आरोपपत्र दाखल केले होते. ज्यात ऑलिम्पिक पदक विजेते कुस्तीपटूचे मुख्य आरोपी म्हणून नाव आहे. आरोपपत्रात, पोलिसांनी वैज्ञानिक पुराव्यांचा विचार केला आहे, ज्यात सागरचे मृत्यूपूर्वी दिलेले बयान, आरोपी जिथे उपस्थित होता, सीसीटीव्ही फुटेज आणि घटनास्थळावरून जप्त केलेली वाहने यांचा समावेश आहे.

आतापर्यंत तपासादरम्यान गोळा केलेल्या पुराव्यांच्या आधारे सर्व आरोपींविरोधात पुरेसे पुरावे आहेत, असे सांगून पोलिसांनी आरोपपत्रात आरोपींना विविध 22 कलमांखाली खटला चालवण्याची विनंती केली. आरोपपत्रात 155 फिर्यादी साक्षीदारांची नावे आहेत, ज्यात वादादरम्यान जखमी झालेल्या चार लोकांचा समावेश आहे. दिल्ली पोलिसांनी आरोपींविरोधात खून, हत्येचा प्रयत्न, हत्येसारखी दोषी हत्या, गुन्हेगारी कट, अपहरण, दरोडा, दंगल अशा गुन्ह्यांसाठी एफआयआर नोंदवला होता.