२१ नोव्हेंबरपासून भारताचा ऑस्ट्रेलिया दौरा, पाहा वेळापत्रक आणि टीम

मुंबई : ऑस्ट्रेलियामध्ये पहिल्यांदाच टेस्ट सीरिज जिंकण्याच्या उद्देशानं भारतीय टीम मैदानात उतरेल. ऑस्ट्रेलियाच्या मोठ्या दौऱ्यासाठी भारतीय टीम रवाना झाली आहे. ऑस्ट्रेलियात भारताला ४ टेस्ट, ३ वनडे आणि ३ टी-२० मॅचची सीरिज खेळायची आहे. ऑस्ट्रेलियाच्या आव्हानाचा मुकाबला करायला आम्ही तयार आहोत, अशी प्रतिक्रिया भारताचा कर्णधार विराट कोहलीनं दौऱ्यावर जाण्याच्या आधी दिली आहे. डेव्हिड वॉर्नर आणि स्टिव्ह स्मिथच्या अनुपस्थितीमध्ये भारताला ऑस्ट्रेलियाला त्यांच्याच मायभूमीत पराभूत करण्याची चांगली संधी आहे. कोणत्याही भारतीय टीमला ऑस्ट्रेलियात टेस्ट सीरिज जिंकता आली नाही.

विराट कोहलीला वेस्ट इंडिजविरुद्धच्या टी-२० सीरिजसाठी आराम देण्यात आला होता. पण ऑस्ट्रेलिया दौऱ्यासाठी विराटचं टीममध्ये पुनरागमन झालं आहे. तर ऑस्ट्रेलियाविरुद्धच्या टी-२० सीरिजसाठी धोनीऐवजी ऋषभ पंतला संधी देण्यात आली आहे. टेस्ट सीरिजसाठी रोहित शर्मा आणि मुरली विजयचं टीममध्ये पुनरागमन झालं आहे. २१ नोव्हेंबरला पहिल्या टी-२० पासून भारत-ऑस्ट्रेलिया सीरिजची सुरुवात होईल. ३ टी-२० मॅचनंतर ४ टेस्ट मॅच आणि मग ३ वनडे मॅचची सीरिज होणार आहे.

वर्ल्ड कपआधी फक्त १३ मॅच

२०१९ साली होणाऱ्या वर्ल्ड कप आधी भारत फक्त १३ मॅच खेळणार आहे. त्यामुळे वनडे टीममध्ये मोठ्या प्रमाणावर बदल होणार नाहीत, असं वक्तव्य भारतीय टीमचे प्रशिक्षक रवी शास्त्रींनी केलं आहे.

भारताच्या ऑस्ट्रेलिया दौऱ्याचं वेळापत्रक

टी-२० सीरिज

पहिली टी-२०- २१ नोव्हेंबर, गाबा- भारतीय वेळेनुसार दुपारी २.३० वाजता

दुसरी टी-२०- २३ नोव्हेंबर, एमसीजी, मेलबर्न- भारतीय वेळेनुसार दुपारी १.३० वाजता

तिसरी टी-२०- २५ नोव्हेंबर, एससीजी, सिडनी- भारतीय वेळेनुसार दुपारी १.३० वाजता

टेस्ट सीरिज

पहिली टेस्ट- ६ डिसेंबर ते १० डिसेंबर, ऍडलेड - भारतीय वेळेनुसार पहाटे ६ वाजता

दुसरी टेस्ट- १४ डिसेंबर ते १८ डिसेंबर, पर्थ- भारतीय वेळेनुसार सकाळी ८ वाजता

तिसरी टेस्ट- २६ डिसेंबर ते ३० डिसेंबर, मेलबर्न- भारतीय वेळेनुसार पहाटे ५ वाजता

चौथी टेस्ट- ३ जानेवारी ते ७ जानेवारी, सिडनी- भारतीय वेळेनुसार पहाटे ५ वाजता

वनडे सीरिज

पहिली वनडे- १२ जानेवारी, सिडनी- भारतीय वेळेनुसार सकाळी ८.५० वाजता

दुसरी वनडे- १५ जानेवारी, ऍडलेड- भारतीय वेळेनुसार सकाळी ९.२० वाजता

तिसरी वनडे- १८ जानेवारी, मेलबर्न- भारतीय वेळेनुसार सकाळी ८.५० वाजता

कुठे बघता येणार मॅच?

भारत आणि ऑस्ट्रेलियात होणाऱ्या या सीरिजच्या मॅच टीव्हीवर सोनी स्पोर्ट्स नेटवर्कवर पाहता येतील. तर मॅचचं ऑनलाईन स्ट्रीमिंग सोनी लिव्हवर दिसेल.

भारताची टी-२० टीम

विराट कोहली(कर्णधार), रोहित शर्मा, शिखर धवन, लोकेश राहुल, श्रेयस अय्यर, मनीष पांडे, दिनेश कार्तिक, ऋषभ पंत, कुलदीप यादव, युझवेंद्र चहल, वॉशिंग्टन सुंदर, कृणाल पांड्या, भुवनेश्वर कुमार, जसप्रीत बुमराह, उमेश यादव, खलील अहमद

भारताची टेस्ट टीम

विराट कोहली (कर्णधार), मुरली विजय, लोकेश राहुल, पृथ्वी शॉ, चेतेश्वर पुजारा, अजिंक्य रहाणे, हनुमा विहारी, रोहित शर्मा, ऋषभ पंत, पार्थिव पटेल, आर.अश्विन, रवींद्र जडेजा, कुलदीप यादव, मोहम्मद शमी, ईशांत शर्मा, उमेश यादव, जसप्रीत बुमराह, भुवनेश्वर कुमार

ऑस्ट्रेलियाची टी-२० टीम

ऍरोन फिंच (कर्णधार), ऍलेक्स कारे, ऍश्टन अगर, जेसन बेहरेंड्रॉफ, नॅथन कुल्टर-नाईल, क्रिस लिन, ग्लेन मॅक्सवेल, बेन मॅकडोर्मेट, डिआर्सी शॉर्ट, बिली स्टेनलेक, मार्कस स्टॉयनिस, एन्ड्रू टाय, ऍडम झाम्पा