बीसीसीआयनं देणी फेडली, स्टुअर्ट बिनीला मिळाले तब्बल एवढे पैसे

मुंबई : बीसीसीआयनं खेळाडू आणि टीमची देणी फेडली आहे. देणी फेडल्याची ही यादी बीसीसीआयनं वेबसाईटवर टाकली आहे. महिला वर्ल्ड कपमध्ये उल्लेखनीय कामगिरी करणाऱ्या खेळाडूंना आणि सपोर्ट स्टाफला प्रत्येकी ४५ लाख रुपये देण्यात आले आहेत. तर कमीतकमी ९ कसोटी खेळणाऱ्या भारताच्या माजी क्रिकेटपटूंनाही ३५ लाख रुपये देण्यात आले आहेत. या खेळाडूंमध्ये योगराज सिंग, रॉबिन सिंग, सरणदीप सिंग आणि टी.ए.शेखर यांना ही रक्कम देण्यात आली.

टीम इंडियाच्या प्रशिक्षकपदावरून राजीनामा दिलेल्या अनिल कुंबळेलाही त्याच्या थकित मानधनाची रक्कम देण्यात आली आहे. मे आणि जून महिन्याचे मिळून कुंबळेला ४८.७५ लाख रुपये देण्यात आलेत. याचबरोबर बीसीसीआयनं स्टुअर्ट बिनीला ५५ लाख रुपये दिले आहेत. गेल्या कित्येक महिन्यांपासून टीममध्ये नसलेल्या स्टुअर्ट बिनीला पैसे दिल्यामुळे सोशल नेटवर्किंगवर मात्र बिनी ट्रोल होतोय.

या देण्यांबरोबरच बीसीसीआयनं २० कोटी रुपयांचा टीडीएस भरला आहे. बंगळुरूमधील एनसीएच्या नुतनीकरणासाठी बीसीसीआयनं कर्नाटक औद्योगिक विकास महामंडळाला ३८ कोटी रुपये दिलेत. 

आयपीएलची रक्कमही बीसीसीआयनं दिली 

२०१७च्या आयपीएलची उपविजेती टीम रायजिंग पुणे सुपरजायंट्सना २१ कोटी रुपये देण्यात आलेत. तर सनरायजर्स हैदराबादला १६ कोटी रुपये मिळाले आहेत. आयपीएलचे मॅच रेफ्री, अंपायर आणि कॅमेरांचे १.६ कोटी रुपयेही बीसीसीआयनं दिले आहेत.