दुष्काळी भागात, सवलतींची बरसात

www.24taas.com, सांगली

सांगली जिल्ह्यात दुष्काळी भागातलं भयाण वास्तव मुख्यमंत्र्यांच्या दौऱ्याच्यावेळी समोर आल्यावर दुष्काळी भागातल्या शेतकऱ्यांचे वीज कनेक्शन न तोडण्याचे आदेश मुख्यमंत्री पृथ्वीराज चव्हाण यांनी दिले आहेत. शेतकऱ्यांच्या वीज बिलाची थकीत रक्कम सरकारतच्या तिजोरीतून देणार असल्याची माहिती त्यांनी दिली आहे. तसंच मोफत चारा देण्याबाबत सरकार गांभीर्यानं विचार करत असल्याचंही त्यांनी नमूद केलंय. टंचाई निवारणाबाबत सर्व जीआर काढण्यात आले आहेत. त्यामुळ जीआर मिळाला नसल्याची सबब अधिकाऱ्यांनी सांगू नये अशी तंबीही मुख्यमंत्र्यांनी दिलीय.

सांगली जिल्ह्यात दुष्काळी भागात एकीकडे जनता पाण्यासाठी वणवण करत असताना अधिकारी मात्र बिअर बारमध्ये मौजमजा करत असल्याचा आरोप खुद्द वनमंत्री आणि सांगलीचे पालकमंत्री पतंगराव कदम यांनी केला. तर अधिकाऱ्यांना कामाला लावण्यासाठी नेते काय करत आहेत, असा सवाल एकनाथ खडसेंनी केलाय, टंचाई निर्मुलन करण्यात सरकार कमी पडलं अशा आर. आर. पाटीलांनी दिलेल्या  कबुलीवरही त्यांनी टीका केली आहे. सरकार म्हणून तुम्ही कमी पडत असाल तर राजीनामे देऊन घरी बसा असा टोला खडसेंनी लगावलाय.