The Kashmir Files सिनेमा फुकट पाहण्याच्या नादात गमवले 30 लाख रुपये, तुम्ही ही चूक करु नका

The Kashmir Files नुकताच प्रदर्शित झालेला हा चित्रपट सध्या चर्चेत आहे. पण सायबर गुन्हेगार देखील याचा गैरफायदा घेताना दिसत आहेत. चित्रपटाच्या नावाचा वापर करून लोकांची फसवणूक होत आहे. फुकट चित्रपट पाहण्याच्या नादात तुमची मोठी फसवणूक होऊ शकते. त्यामुळे वेळीच सावध व्हा.

नोएडाचे अतिरिक्त उपायुक्त रणविजय सिंह यांनी 'द काश्मीर फाइल्स'शी संबंधित व्हॉट्सअॅप स्कॅमबद्दल मोबाईल युजर्सला महत्त्वाची सूचना दिली आहे. या सिनेमाच्या नावाखाली कोणतीही लिंक आली तर ती ओपन करु नका. कारण असं करणं तुम्हाला महाग पडू शकतं.

व्हॉट्सअॅपवर येणाऱ्या कोणत्याही लिंकवर क्लिक करणं हे तसंही जोखमीचं असतं. पण आता या चित्रपटाच्या नावावर फसवणूक होते आहे. याबाबत अनेक तक्रारी आल्या आहेत. द काश्मीर फाइल्स पाहण्यासाठी लोकांमध्ये प्रचंड उत्सुकता आहे आणि याचाच फायदा घेत सायबर गुन्हेगारांनी व्हॉट्सअॅपवर चित्रपट मोफत डाउनलोड करण्यासाठी लिंक पाठवली आहे.

एखाद्या व्यक्तीने व्हॉट्सअॅपवर या लिंकवर क्लिक करताच, फसवणूक करणाऱ्यांना वापरकर्त्याच्या फोनची माहिती मिळते आणि ते सहजपणे वैयक्तिक माहिती चोरतात. रणविजय सिंह यांनी टाईम्स ऑफ इंडियाशी बोलताना ही माहिती दिली आहे.

फसवणूक करणारे लोक व्हॉट्सअॅपवर लिंक पाठवतात आणि या लिंकसोबत एक मेसेज असतो ज्यामध्ये म्हटले आहे की लोक लिंकवर क्लिक करून काश्मीर फाइल्स चित्रपट विनामूल्य डाउनलोड करू शकतात. कोणताही वापरकर्ता लिंकवर क्लिक करताच, मालवेअर वापरकर्त्याच्या स्मार्टफोनमध्ये जातो.

मालवेअर नंतर वापरकर्त्याचे बँकिंग तपशील चोरण्याचे काम करते. रणविजय सिंह यांनी स्मार्टफोन वापरणाऱ्यांना सल्ला दिला आहे की, व्हॉट्सअॅपवर अशी कोणतीही लिंक आल्यास त्यावर क्लिक करू नका.

टाईम्स ऑफ इंडियाच्या वृत्तानुसार, रणविजय सिंह यांनी सांगितले की, 24 तासांत तीन लोक पोलीस स्टेशनमध्ये पोहोचले आणि सर्वांनी सायबर फ्रॉडची तक्रार दाखल केली, तिन्ही लोकांचे एकूण 30 लाख रुपयांचे नुकसान झाले आहे.