खूशखबर ! स्टेट बँकेने एफडीवरील व्याजदर वाढवला

नवी दिल्ली : देशातील सर्वात मोठी बँक स्टेट बँक ऑफ इंडियाने फिक्स्ड डिपॉजिट्सवर व्याजदर वाढवले आहेत. एफडीच्या व्याजदरांवर 5 ते 10 बेसिस पॉईंटची वाढ केली आहे. म्हणजेच 0.05 टक्के ते 0.1 टक्के व्याजदर वाढवण्यात आला आहे. 100 बेसिस पॉईंट 1 टक्क्याच्या बरोबरीचा असतो. हे नवे व्याजदर 30 जुलैपासून लागू होणार आहे.

एसबीआयने आपल्या वेबसाईटवर म्हटलं आहे की, 1 ते 2 वर्षाच्या एफडीवर आता 6.70% टक्के व्याजदर मिळेल जे आधी 6.65 टक्के होते. दुसरीकडे 2 ते 3 वर्षाच्या एफडीवर 6.75 टक्के व्याजदर मिळणार आहे जे आधी 6.65 टक्के होतं. वरिष्ठ नागरिकांसाठी 1 ते 2 वर्षाच्या एफडीवर 7.15% ऐवजी आता 7.20% व्याज तर 2 ते 3 वर्षाच्या एफडीवर 7.15% ऐवजी 7.25% व्याजदर मिळणार आहे. हे व्याजदर 1 कोटी रुपयांपर्यंतच्या एफडीवर लागू असणार आहेत.

छोट्या काळासाठी ठेवण्यात आलेल्या मोठ्या रक्कमेच्या एफडीवरील व्याजदर कमी करण्यात आले आहेत. 1 ते 2 वर्षासाठी 1 कोटी ते 10 कोटी रुपयांच्या एफडीवर आधी 7% व्याजदर होता आता तो 6.70% झाला आहे. वरिष्ठ नागरिकांसाठी असलेला व्याजदर 7.50% वरुन 7.20% करण्यात आला आहे. 

एसबीआयने 28 मेला व्याजदरात बदल केले होते. एसबीआयने आज केलेल्या व्याजदरांमधील बदलामुळे एसबीआयच्या शेअरची खरेदी वाढली आहे.