राहुल गांधी यांच्या नेतृत्वाखालील विरोधी पक्षांनी केला विरोधी एकजूट मजबूत करण्याचा प्रयत्न

नवी दिल्ली : संसदेच्या पावसाळी अधिवेशनात सरकार आणि विरोधकांमध्ये खडाजंगी झाली आहे. दरम्यान, काँग्रेस (Congress) नेते राहुल गांधी (Rahul Gandhi ) यांच्या नेतृत्वाखालील विरोधी पक्षांनी विरोधी एकजूट मजबूत करण्याचा प्रयत्न केला. राहुल गांधी यांनी आज मंगळवारी विरोधी पक्षांना नाश्त्यासाठी आमंत्रित केले होते आणि विरोधी पक्षाचे 14 नेते त्यांच्या 'ब्रेकफास्ट पॉलिटिक्स' मध्ये (breakfast meeting) उपस्थित होते.

या पक्षांचे नेते बैठकीला उपस्थित होते

कॉंग्रेस, तृणमूल काँग्रेस (टीएमसी), राष्ट्रीय जनता दल (आरजेडी), शिवसेना, समाजवादी पार्टी (सपा), राष्ट्रवादी काँग्रेस पार्टी (राष्ट्रवादी), भारतीय कम्युनिस्ट पार्टी (सीपीआय) च्या कॉन्स्टिट्यूशन क्लब ऑफ दिल्लीच्या आवाहनावर राहुल गांधी. सीपीएम, आययूएमएल, आरएसपी, केसीएम, नॅशनल कॉन्फरन्स, झारखंड मुक्ती मोर्चा (जेएमएम) आणि द्रमुकचे नेते बैठकीला उपस्थित होते.

या 2 पक्षांनी राहुल यांच्या बैठकीपासून दूर

राहुल गांधी यांच्या 'ब्रेकफास्ट मीटिंग'मध्ये काँग्रेससह 14 पक्षांचे नेते उपस्थित होते, पण मायावतींचा पक्ष बहुजन समाज पार्टी (बसपा) आणि अरविंद केजरीवाल यांचा आम आदमी पक्ष (आप) यांनी या बैठकीपासून स्वतःला दूर ठवले. राहुल गांधी यांच्या मिटिंगला आप आणि बसपाचे नेते उपस्थित राहिले नाहीत.

राहुल गांधींच्या 'ब्रेकफास्ट मीटिंग'चा मेनू

राहुल गांधी यांच्या 'ब्रेकफास्ट मीटिंग'मध्ये उत्तर ते दक्षिणेकडील खाद्य पदार्थ ठेवण्यात आले होते. उत्तर भारतापासून दक्षिण भारतातील नेत्यांनी या बैठकीला हजेरी लावली आणि याच नाश्त्याची व्यवस्था यावेळी करण्यात आली. नाश्त्याच्या मेनूमध्ये चोले-भटूरे, उपमा, इडली, सँडविच, वडा-सांबार यांचा समावेश होता.

दरम्यान, त्याआधी शिवसेना नेते संजय राऊत यांनी राहुल गांधी यांची भेट घेत चर्चा केली होती. राजधानी दिल्लीत राजकीय घडामोडींना वेग आला आहे. तिसऱ्या आघाडीची चाचपणी करण्यात येत असल्याची चर्चा सुरु झाली आहे. दरम्यान, पश्चिम बंगालच्या मुख्यमंत्री ममता बॅनर्जी यांनी अलिकडेच काँग्रेस अध्यक्षा सोनिया गांधी, खासदार राहुल गांधी यांची भेट घेतल्याचे पुढे आले. त्याचवेळी राष्ट्रवादीचे अध्यक्ष शरद पवार आणि ममता बॅनर्जी यांच्या भेटीची चर्चा होती. मात्र, त्यांची भेट काही होऊ शकलेली नाही. अशातच आता शिवसेना नेते आणि राज्यसभा सदस्य संजय राऊत यांनी राहुल गांधी यांची भेट घेतली. या भेटीत अनेक विषयांवर चर्चा झाली.

शिवसेना नेते संजय राऊत यांनीच या भेटीबाबत माहिती दिली. राहुल गांधी यांच्यासोबत बैठक झाली. राहुल गांधी यांच्यासोबत  आमची एक भेट राहिली होती, त्यांच्या मनात काही शंका होत्या त्या दूर झाल्या आहेत. त्यांनी मी लवकरच महाराष्ट्रात येईन, असे आश्वासन दिले आहे, अशी माहिती राऊत यांनी दिली.