कोरोनाचा कहर थांबेना! गेल्या 24 तासांत 8 रूग्णांचा मृत्यू

दिल्ली : दिल्लीत पुन्हा एकदा कोरोनाची प्रकरणं वाढू लागली आहेत. आरोग्य विभागाने गुरुवारी जाहीर केलेल्या आकडेवारीनुसार, गेल्या 24 तासांत कोरोनाचे 1,964 नवीन रुग्ण आढळले आहेत. या कालावधीत 8 जणांचा कोरोनामुळे मृत्यू झाला आहे.

मात्र, गेल्या 24 तासांत कोरोनातून बरे झालेल्या रुग्णांची संख्या 1,939 झाली आहे. तर दिल्लीत कोरोनाचे एकूण एक्टिव्ह रुग्ण 6,826 आहेत. कोरोनाचा पॉझिटीव्हिटी रेट 9.42% आहे.

बुधवारीही 1600 हून अधिक कोरोनाच्या नवीन रुग्णांची नोंद झाली आहे. आरोग्य विभागाने बुधवारी माहिती दिली की, गेल्या 24 तासांत दिल्लीत कोरोनाचे 1652 नवीन रुग्ण आढळले आहेत. तर 8 जणांचा मृत्यू झाला आहे. Omicron चे BA.4 आणि BA.5 सब-व्हेरिएंट राजधानीत सक्रिय झाल्यानंतर प्रकरणांमध्ये झपाट्याने वाढ झालीये.

दरम्यान, देशाची आर्थिक राजधानी मुंबईतही कोरोनाचे 1201 नवीन रुग्ण आढळले आहेत. तर गेल्या 24 तासांत कोरोनामुळे 2 जणांचा मृत्यू झाला आहे.

नवीन व्हेरिएंट अधिक संक्रामक

लोकनायक जयप्रकाश नारायण हॉस्पिटलमध्ये नुकत्याच झालेल्या अभ्यासात BA 2.75 प्रकार आढळून आला. दरम्यान हा अधिक वेगाने पसरत असल्याचं लक्षात आलंय. बुधवारी दिल्लीत कोरोनाचा पॉझिटिव्हीटी रेट 9.92% होता. तर मंगळवारी दिल्लीत कोरोनाचा पॉझिटिव्हीटी रेट 19.20% नोंदवला गेला.

व्हायरल ताप आणि फ्लू देखील सक्रिय

दरम्यान, दिल्ली-एनसीआर कोरोनामध्ये व्हायरल फिव्हर आणि फ्लूनेही डोकं वर काढल्याचं दिसतंय, असं एका सर्वेक्षणातून समोर आलंय. सर्वेक्षणानुसार, गेल्या 30 दिवसांत 10 पैकी 8 घरं कोविड किंवा व्हायरल ताप किंवा फ्लूच्या विळख्यात आली आहेत.