కదులుతున్న రైలు ఎక్కబోయి కిందపడిన బాలుడు రైలుకి, ప్లాట్‌ఫామ్‌కి మధ్య చిక్కుకోగా అక్కడికి సమీపంలో వున్న ఓ ఆర్పీఎఫ్ కానిస్టేబుల్ ప్రాణాలకి తెగించి ఆ బాలుడిని కాపాడిన ఘటన ఇది. ముంబైలోని నైగావ్ రైల్వే స్టేషన్‌లో శుక్రవారం చోటుచేసుకున్న ఈ ఘటనకు సంబంధించిన దృశ్యం అక్కడే వున్న సీసీటీవీ కెమెరాలో రికార్డ్ అయింది.
వివరాల్లోకి వెళ్తే, నైగావ్ రైల్వే స్టేషన్‌లో ఓ మహిళ తన ఏడేళ్ల కొడుకుతో కలిసి రైలు ఎక్కే ప్రయత్నం చేసింది. ఆమె రైలు ఎక్కిన వెంటనే ఆ బాలుడు కూడా తల్లిని అనుసరిస్తూ రైలు ఎక్కబోయాడు కానీ ఈలోపే రైలు కదిలింది. దీంతో రైలు ఎక్కే ప్రయత్నం చేసిన బాలుడు అనుకోకుండా రైలుకి, ప్లాట్‌ఫామ్‌కి మధ్య వున్న చిన్న సందులో పడిపోయాడు.
#WATCH Railway Protection Force personnel saves a boy from falling under a moving train at Naigaon railway station in Mumbai (2.2.18) pic.twitter.com/So8En2GkzI
— ANI (@ANI) February 5, 2018
అదే సమయంలో అక్కడికి కొద్దిదూరంలో వున్న రైల్పే ప్రొటెక్షన్ ఫోర్స్‌కి చెందిన ఓ కానిస్టేబుల్ హుటాహుటిన అక్కడికి పరిగెత్తుకొచ్చాడు. అప్పటికే రైలు వేగం పుంజుకుంది. అయినప్పటికీ అతడు తన ప్రాణాన్ని లెక్కచేయకుండా ఆ బాలుడిని కాపాడేందుకు ముందుకు దూకాడు. బాలుడు రైలు కిందపడి నలిగిపోకుండా తన శాయశక్తులా కృషిచేసి అతడి ప్రాణాలు కాపాడాడు. ప్లాట్‌ఫామ్‌పై నిలిచి వున్న ఇతర ప్రయాణికులు ఆ ఆర్పీఎఫ్ కానిస్టేబుల్ చేస్తోన్న ప్రయత్నాన్ని గమనించి అతడికి తమ వంతు సహాయం అందించారు. మొత్తానికి తన ప్రాణాల్ని లెక్కచేయకుండా బాలుడిని కాపాడిన ఆర్పీఎఫ్ కానిస్టేబుల్‌ని నిజంగా మనస్పూర్తిగా అభినందించితీరాల్సిందే.
