காமராஜர் சாலையில் இருந்த நடிகர் சிவாஜி சிலை நேற்று நள்ளிரவில் அகற்றப்பட்டது. மேலும் அகற்றப்பட்ட அந்த சிலை அடையாறில் உள்ள மணிமண்டபத்தில் வைக்கப்படவுள்ளது.
சென்னை மெரினா கடற்கரை எதிரில் நடிகர் சிவாஜி கணேசனின் முழு உருவச் சிலை காமராஜர் சாலை-ராதாகிருஷ்ணன் சாலை சந்திப்பில் நிறுவப்பட்டிருந்தது. இந்த சிலை போக்குவரத்துக்கு இடையூறாக இருப்பதாகக் கூறி சென்னை ஐகோர்ட்டில் வழக்கு தொடரப்பட்டது. இதனால் சிலையை அகற்றும்படி கோர்ட் தீர்ப்பளித்தது.
இதனையடுத்து அகற்றப்படும் சிவாஜி சிலை, அடையாறு அருகே கட்டப்படும் சிவாஜி மணிமண்டபத்தில் வைக்கப்படும் என்று தமிழக அரசு அறிவித்தது.
இந்நிலையில் நேற்று நள்ளிரவில் நடிகர் சிவாஜி சிலை அகற்றும் பணி துவங்கப்பட்டு, அதிகாலையில் பத்திரமாக சிலை அகற்றப்பட்டது. அகற்றப்பட்ட நடிகர் சிவாஜி சிலையை விரைவில் அடையாறில் உள்ள மணிமண்டபத்தில் வைக்கப்படவுள்ளது.
