మెగా అభిమానులకు, పవర్ స్టార్ అభిమానులకు ఇదో ఆసక్తికరమైన వార్త. స్టైలిష్ స్టార్ అల్లు అర్జున్ నటించిన లేటెస్ట్ సినిమా నా పేరు సూర్య సక్సెస్ మీట్‌కి పవర్ స్టార్ పవన్ కల్యాణ్ చీఫ్ గెస్ట్‌గా విచ్చేయనున్నారనే వార్త సినీ పరిశ్రమలోనే కాకుండా రాజకీయంగానూ ఆసక్తిని రేకెత్తిస్తోంది. మెగా ఫ్యామిలీ అంతా పవన్ వెంటే వున్న సందర్భంలోనూ.. 'నేను చెప్పను బ్రదర్' అనే ఒకే ఒక్క డైలాగ్‌తో పవన్ అభిమానులకు కాస్త దూరమైన అల్లు అర్జున్ ఇటీవల పవన్ కల్యాణ్‌కి తన మద్దతు పలికి మళ్లీ మెగా ఫ్యామిలీ అంతా ' హమ్ సాత్ సాత్ హై ' అని చాటి చెప్పాడు. ఇటీవల కాలంలో ఒక వర్గం మీడియా పవన్ కల్యాణ్‌పై విమర్శలు ఎక్కుపెట్టిన సందర్భంలో పవన్ కల్యాణ్‌ని వెనకేసుకొచ్చి అతడిపై తన అభిమానాన్ని చాటుకున్నాడు అల్లు అర్జున్. దీంతో ఈ ఇద్దరి మధ్య ఇప్పటివరకు కనిపించిన గ్యాప్ ఇక కనుమరుగైనట్టే అనే టాక్ వినిపించింది. అందుకు తగినట్టుగానే మే 10వ తేదీన హైదరాబాద్‌లో జరగనున్న నా పేరు సూర్య సినిమా సక్సెస్ మీట్ కి పవన్ కల్యాణ్ వస్తున్నారనే వార్త ఆ టాక్ ని నిజం చేసి చూపిస్తోంది.
ఇటీవలే రామ్ చరణ్ నటించిన రంగస్థలం సినిమా సక్సెస్ మీట్‌కి పవన్ కల్యాణ్ ముఖ్య అతిథిగా రావడం ఆ ఇరువురు హీరోల అభిమానులకు కన్నుల పండుగగా కనిపించింది. ఇక ఇప్పుడు అల్లు అర్జున్ సినిమా ఫంక్షన్‌లో అదే వేదికపై స్టైలిష్ స్టార్‌ని, పవర్ స్టార్‌ని పక్కపక్కనే చూస్తే ఆ దృశ్యం కూడా మరో పండగలానే వుంటుందని ఆ సక్సెస్ మీట్ క్షణాల కోసం వేచిచూస్తున్నారు ఆ ఇద్దరు హీరోల అభిమానులు.
