భారతీయ క్రికెటర్ హర్భజన్ సింగ్ ఈ రోజు ఆసక్తికరమైన వ్యాఖ్యలు చేశారు. భారతదేశంలో హిందు, ముస్లిం మతాల మధ్య తలెత్తే వివాదాలకు అందరూ స్వస్తి పలకాలని భావిస్తున్నానని చెబుతూ హర్భజన్ పలు వ్యాఖ్యలు చేశారు. "50 లక్షల జనాభా కూడా లేని క్రొయేషియా.. ఈ రోజు ఫిఫా ఫైనల్ కప్ కోసం పోరాడుతోంది. కానీ 135 కోట్ల జనాభా ఉన్న భారత్ ఇంకా ఇక్కడ హిందూ ముస్లిం గేమ్ మాత్రమే ఆడుతోంది" అని హర్భజన్ ట్విట్టర్ వేదికగా తన ఆలోచనలను పంచుకున్నారు. ఈ వ్యాఖ్యలు చేశాక హర్భజన్ సింగ్ "సోచ్ బద్లో.. దేశ్ బద్లేగా" అని ట్యాగ్ చేస్తూ తన అభిమానులకు ట్వీట్ చేశారు.
"మీ ఆలోచనలు మార్చుకుంటే.. దేశం కూడా మారుతుంది" అనేది ఆ స్లోగన్ అర్థం. తాజాగా పెద్దగా అంచనాలు లేని పసికూన జట్టు క్రొయేషియా ఫిఫా ఫైనల్‌కు చేరిన సంగతి తెలిసిందే. నైజీరియా, అర్జెంటీనా, ఐస్లాండ్ లాంటి దిగ్గజ జట్ల మీదే విజయం సాధించి ఈ సారి క్రొయేషియా ఫైనల్ బెర్తు కైవసం చేసుకుంది.
ఈ రోజు రాత్రి 8.30 నిముషాలకు ఫ్రాన్స్, క్రొయేషియా జట్ల మధ్య ఫుట్ బాల్ మ్యాచ్ జరుగుతున్న క్రమంలో హర్భజన్ సింగ్ ఈ వ్యాఖ్యలు చేశారు. కాగా, ఈ సారి ఫిఫా ఫైనల్‌‌లో కప్పు చేజిక్కించుకోవడం కోసం ఇరు జట్లు బాగానే సన్నద్ధమవుతున్నాయి. ముఖ్యంగా తమకంటే ఎన్నో రెట్లు బలమున్న ఫ్రాన్స్ జట్టుపై క్రొయేషియా ఆటగాళ్లు ఏ మాత్రం ప్రభావం చూపిస్తారో చూడాలని ఫుట్ బాల్ అభిమానులు కూడా వేచిచూస్తున్నారు.
ఇదిలా ఉండగా.. ఈ ఫైనల్ మ్యాచ్ పై ఎందరో బెట్టింగ్ బాబుల జీవితాలు కూడా ఆధారపడి ఉన్నాయి. భారత్‌లో ఈ బెట్టింగ్ రాయుళ్ల ఆట కట్టించడానికి ప్రత్యేక నిఘా వ్యవస్థను కూడా ఇప్పటికే పోలీస్ శాఖ వారు ఏర్పాటు చేయడం జరిగింది.
लगभग 50 लाख की आबादी वाला देश क्रोएशिया फ़ुटबॉल वर्ल्ड कप का फाइनल खेलेगा
और हम 135 करोड़ लोग हिंदू मुसलमान खेल रहे है।#soch bdlo desh bdlega— Harbhajan Turbanator (@harbhajan_singh) July 15, 2018
